Qızıl qiymətləri tarixi zirvəyə yüksəldikdən sonra sabit ticarət dinamikası ilə davam edib.

ABŞ hökumətinin bağlanması və özəl sektor məşğulluq göstəricilərinin zəif açıqlanması fonunda investorların Federal Ehtiyat Sisteminin (FED) faiz endirimi gözləntiləri güclənib. Bunun təsiri ilə külçə qızıl dünənki zirvədən təxminən 25 dollar aşağı – 3.870 dollar ətrafında ticarət olunub.

Federal hökumətin fəaliyyətlərinin dayanması FED-in faiz qərarları üçün ehtiyac duyduğu mühüm iqtisadi statistikaların dərcinə maneə yaradır. Buna görə iqtisadçılar, investorlar və siyasətçilər çərşənbə günü kəskin azalma göstərən özəl məşğulluqla bağlı ADP məlumatı kimi qeyri-rəsmi mənbələrə daha çox diqqət yetirməyə başlayıblar.

Sabah açıqlanacaq qeyri-kənd təsərrüfatı məşğulluq hesabatı da hökumət bağlandığı üçün təxirə salınacaq. Analitiklər bu vəziyyətin dollar üzərində əlavə təzyiq yarada biləcəyini qeyd edirlər.

İnvestorlar zəifləyən əmək bazarını dəstəkləmək məqsədilə FED-in bu il daha iki dəfə faiz endirəcəyini qiymətləndirirlər.

Qızıl bu il 47% bahalaşaraq 1979-cu ildən bəri ən böyük illik qazancına doğru irəliləyir. Bu artımı mərkəzi bankların alışları və qızıl dəstəkli birja fondlarına (ETF) yönəlim dəstəkləyib. FED-in faiz endirimlərinə yenidən başlaması isə prosesi sürətləndirib.

Bakı vaxtı ilə saat 04:10-da spot qızıl 0,2% ucuzlaşaraq 3.859,22 dollara düşüb. Dünən isə 0,2% artımla bağlanmışdı. “Bloomberg Dolar Spot” İndeksi isə sabit qalıb. Gümüş, əvvəlki sessiyada son 14 ilin zirvəsinə yüksəldikdən sonra enib. Platin və palladiumda da azalma qeydə alınıb.