Qızıl dünən tarixi rekord səviyyəyə yüksəldikdən sonra, bu gün investorların qazanc realizasiyasına getməsi nəticəsində bir qədər ucuzlaşıb. ABŞ Mərkəzi Bankının (FED) faiz endirimlərini davam etdirəcəyi gözləntiləri və güclü “təhlükəsiz liman” tələbi qiymətləri dəstəkləsə də, qısamüddətli satışlar bazarda təzyiq yaradıb.

“KCM Trade” şirkətinin baş bazar analitiki Tim Vaterer bildirib ki, “qazanc satışları və təhlükəsiz liman alımlarının bir qədər zəifləməsi bu gün qızıl qiymətlərindəki yüksəlişin tempini azaldıb. Lakin FED-in hazırkı faiz endirimi dövrünü davam etdirdiyi şəraitdə, qızıldakı hər eniş alım fürsəti kimi görüləcək”.

Bazar iştirakçıları noyabr ayında dörddəbir bəndlik faiz endirimini və dekabrda əlavə bir azalma qərarını artıq tam şəkildə qiymətlərə daxil ediblər. Analitiklərə görə, bu siyasət istiqaməti qızılın orta müddətli perspektivdə yüksək səviyyələrdə qalmasına səbəb ola bilər.

“Bu həftənin sonuna doğru açıqlanacaq ABŞ istehlak qiymətləri indeksində (Personal Consumption Expenditures Price Index – PCE) mənfi bir sürpriz yaşanmadığı təqdirdə, qızıl bazarında yüksəliş üçün hələ də geniş məkan var”, – Vaterer vurğulayıb.

Digər tərəfdən, ABŞ hökumətinin fəaliyyətinin dayandırılması səbəbindən (bloklanma) bəzi iqtisadi məlumatların açıqlanması gecikir. Oktybarın 25-də dərc olunması gözlənilən göstəricilər investorların diqqət mərkəzindədir. Ağ Ev iqtisadi müşaviri Kevin Hassett isə hökumət bloklanmasının bu həftə ərzində başa çatmasının “böyük ehtimalla mümkün olduğunu” bildirib.