Avropa Birliyinin (AB) enerji məsələləri üzrə komissarı Kadri Simson bildirib ki, AB Ukrayna tranzit marşrutu ilə tədarük edilən Rusiya qazı olmadan yaşamağa hazırdır.

Simson bu fikirləri, Avropanın enerji transformasiyasında atdığı addımların qiymətləndirildiyi “Aİ Enerji Birliyi 2024” hesabatı ilə bağlı Brüsseldə keçirdiyi mətbuat konfransında deyib.

AB-nin son iki ildə bərpa olunan enerjinin quraşdırılmasında sürətlə irəlilədiyini xatırladan Simson, “2024-cü ilin ilk yarısında külək və günəş enerjisi ilk dəfə elektrik istehsalında qalıq yanacaqları geridə qoyaraq yeni bir rekorda imza atdı”, – dedi.

Simson bərpa olunan enerji mənbələrindən geniş istifadəni təmin etmək üçün bazar inteqrasiyasının, şəbəkə və infrastruktur investisiyalarının vacibliyinə diqqət çəkib.

Rus qalıq yanacaqlarından onilliklər boyu davam edən “asılılığa” son qoymağı bacardıqlarını ifadə edən Simson, keçmişdə AB-nin Rusiyadan hər il 150 milyard kubmetr qaz idxal etdiyini, lakin hazırda bunun 50 milyard kubmetrin altına düşdüyünü qeyd edib.

“Rusiyadan asılılığımız 2021-ci ildə 45 faiz idisə, keçən il bu rəqəm 15 faizə düşüb”, – deyə Simson bildirib.

AB qaz çənlərinin hədəflənən 1 noyabr tarixindən həftələr əvvəl yüzdə 90 doluluğa çatdığını xatırladan Simson, Avropanın 2022-2024-cü illər arasında qaz istehlakını yüzdə 18 azaltdığını vurğulayıb.

Simson qeyd edib ki, qarşıdakı 5 il AB üçün təmiz enerji keçidinə nail olmaq, iqlim öhdəliklərini yerinə yetirmək və sənayesinin rəqabət qabiliyyətini saxlamaq üçün kritikdir.

“Biz Avropanın enerji təchizatının təhlükəsizliyini təhdid etmədən Rusiya qazından mərhələli şəkildə imtinanı başa çatdırmaqda qərarlıyıq”.

Simson bildirib ki, AB Ukrayna tranzit yolundan Rusiya qazı gəlmədən yoluna davam etməyə hazırdır. Avropada enerjinin hələ də çox baha olduğunu bildirən Simson, “Yüksək enerji qiymətləri Avropanın, xüsusən də, Çin və ABŞ-a qarşı beynəlxalq rəqabət qabiliyyətinə təsir edir”, – deyib.

Enerji qiymətlərini 2022-ci ildə pik səviyyəsindən aşağı salmaq üçün çox çalışdıqlarını vurğulayan Simson, bu mərhələdə struktur problemlərinin həll edilməsi lazım olduğunu bildirib.

Simson qiymətləri endirməyin əsas yolunun bərpa olunan enerji avadanlığının quraşdırılmasını sürətləndirmək olduğunu bildirib.

Enerji infrastrukturu və şəbəkənin inkişafına daha çox dəstək vermələri lazım olduğunu ifadə edən Simson, rəqabət qabiliyyətini, təchizat təhlükəsizliyini və iqtisadi dayanıqlığı təmin etmək üçün təmiz enerjiyə daha çox diqqət yetirməli və daha az qalıq yanacaq idxal etmələri lazım olduğunu izah edib.