Beynəlxalq Enerji Agentliyi (BEA) bu ilə dair qlobal neft tələbi artımı proqnozunu gündəlik 60 min barel yuxarı istiqamətdə yenilədi.

BEA-nın “Neft bazarı hesabatı”na görə, cari ildə neft tələbinin ötən illə müqayisədə gündəlik təxminən 740 min barel artaraq 103 milyon 875 min barelə yüksələcəyi gözlənilir. Əvvəlki hesabatda bu artım gündəlik təxminən 680 min barel olaraq proqnozlaşdırılmışdı.

Aşağı səviyyədə qalan neft qiymətləri, qismən yaxşılaşan iqtisadi mənzərə və inkişaf etmiş iqtisadiyyatların bir hissəsində həyata keçirilən güclü tədarüklər, tələbin artım proqnozunda rol oynayıb.

Qeyri-müəyyən makroiqtisadi mühitə baxmayaraq İqtisadi Əməkdaşlıq və İnkişaf Təşkilatı (İƏİT) ölkələrinin neft tələbinin il ərzində davamlı qalması da artım proqnozunu dəstəkləyib.

Hesabatda qeyd olunur ki, tələbin İƏİT bölgəsində ötən illə müqayisədə gündəlik 35 min barel azalaraq 45 milyon 807 min barel, İƏİT-dən kənar ölkələrdə isə gündəlik 772 min barel artaraq 58 milyon 68 min barel olacağı gözlənilir.

Qlobal neft tələbinin 2026-cı ildə bu illə müqayisədə gündəlik 700 min barel artımla 104 milyon 572 min barel səviyyəsinə çatacağı proqnozlaşdırılır.

Qlobal neft təklifi avqustda artdı

Digər tərəfdən, qlobal neft təklifi avqust ayında gündəlik 20 min barel artaraq 106 milyon 930 min barellə rekord səviyyəyə yüksəldi.

Bu artımda OPEC+ qrupunun hasilat ixtisarlarını yumşaltmağa davam etməsi və OPEC+-dan kənar təklifin tarixi zirvələrə yaxın qalması təsirli olub.

Hesabata görə, həmin dövrdə OPEC qrupunun xam neft təklifi əvvəlki ayla müqayisədə gündəlik təxminən 150 min barel artaraq 34 milyon 330 min barel olub.

OPEC-dən kənar ölkələrin gündəlik neft hasilatı isə eyni dövrdə gündəlik təxminən 130 min barel azalaraq 72 milyon 600 min barel səviyyəsinə düşüb.

Ümumilikdə, qlobal neft təklifinin bu il gündəlik 105 milyon 800 min barel, gələn il isə 107 milyon 900 min barel olacağı ehtimal edilir.