Artan yanacaq qiymətləri avtomobil bazarında balansı dəyişməyə başlayıb. 2026-cı ilin ilk aylarında elektrikli avtomobillərə tələbat sürətlə yüksəlib, ümumi avtomobil satışlarında isə azalma qeydə alınıb.

VAXT.AZ ““Bloomberg”ə istinadən xəbər verir ki, İran ətrafında baş verən hərbi gərginlik və Hörmüz boğazı bölgəsindəki vəziyyət dünya neft qiymətlərinə təsir göstərib. Nəticədə yanacağın bahalaşması sürücülərin seçimlərinə birbaşa təsir edib.

Yüksək xərclər fonunda istehlakçılar alternativ variantlara yönəlməyə başlayıb. Xüsusilə aşağı istismar xərcləri ilə seçilən elektrikli avtomobillərə maraq kəskin artıb. “Plateforme automobile” tərəfindən açıqlanan məlumata görə, 2026-cı ilin ilk dörd ayında elektrikli avtomobil satışları 48 faiz artaraq 148 min ədədi keçib.

Bunun əksinə olaraq ümumi avtomobil bazarında eyni dinamika müşahidə olunmayıb. Aprel ayında yeni avtomobil satışlarında cüzi azalma qeydə alınıb. Ekspertlər bunu yüksək qiymətlərin alıcıları daha ehtiyatlı davranmağa vadar etməsi ilə əlaqələndirir.

Yanacağın bir litrinin qiymətinin 2 avronu keçməsi xüsusilə gündəlik avtomobil istifadəsindən asılı olan sürücülər üçün ciddi maliyyə yükü yaradıb. Elektrikli avtomobillərin şarj xərclərinin ənənəvi yanacaq növləri ilə müqayisədə daha aşağı olması isə bu nəqliyyat vasitələrini daha cəlbedici edib.

Elektrikli avtomobillərə marağın artması bu sahəyə investisiya yatıran şirkətlər üçün də yeni imkanlar yaradıb. “Tesla” bazarda diqqətçəkən artım nümayiş etdirərkən, “Renault” münasib qiymətli elektrikli modellərlə mövqeyini gücləndirib.

Mütəxəssislərin fikrincə, hazırkı tendensiya qısamüddətli dalğalanma deyil, avtomobil sənayesində uzunmüddətli transformasiyanın başlanğıcıdır. Yanacaq qiymətlərində qeyri-müəyyənlik davam etdikcə elektrikli avtomobillərə marağın daha da artacağı gözlənilir.