Dünyanın ən böyük investisiya banklarından olan “Goldman Sachs” bildirib ki, Yaxın Şərqdə davam edən müharibə fonunda qlobal xam neft və neft məhsulları ehtiyatları rekord sürətlə azalır və dünya bazarında ciddi təchizat sıxıntısı yaranıb

VAXT.AZ “Bloomberg”ə istinadən xəbər verir ki, aank analitiklərinin iki gün əvvəlki (20 may) hesabatına görə, görünən qlobal ehtiyatlar may ayında gündəlik 8,7 milyon barel həcmində azalıb. Bu göstərici münaqişənin başlanmasından bəri müşahidə olunan orta azalma tempindən təxminən iki dəfə yüksəkdir.

Analitiklər qeyd ediblər ki, neft bazarlarında gərginlik artmaqda davam edir. Hesabata əsasən, Hörmüz boğazı vasitəsilə həyata keçirilən neft ixracı normal səviyyənin cəmi 5 faizi həcmində qiymətləndirilir.

Hesabatda vurğulanır ki, qlobal enerji bazarları müharibənin yaratdığı görünməmiş təchizat böhranı ilə üzləşib. Münaqişədən əvvəl formalaşan ehtiyatların sürətlə əridiyi, bəzi hökumətlərin isə qiymət artımını cilovlamaq üçün strateji neft rezervlərini bazara çıxardığı bildirilir.

Beynəlxalq Enerji Agentliyinin rəhbəri Fatih Birol da ötən həftə kommersiya neft ehtiyatlarının sürətlə azaldığı barədə xəbərdarlıq etmişdi.

Agentlik hesab edir ki, münaqişə yaxın zamanda başa çatsa belə, bazar ən azı oktyabr ayına qədər “ciddi təchizat çatışmazlığı” yaşamaqda davam edəcək.

“Goldman Sachs” analitiklərinin qiymətləndirməsinə görə, may ayında qeydə alınan ehtiyat azalmasının təxminən üçdə ikisi su üzərindəki neft adlandırılan daşınmaların azalması ilə bağlıdır.

Məlumata görə, ixracdakı azalma idxaldakı zəifləməni üstələyib. Xüsusilə Asiyadan Avropaya qədər enerji axınlarında zəifləmə müşahidə olunur. Hesabatda qeyd edilir ki, Avropanın aviasiya yanacağı idxalı 2025-ci ilin orta göstəricisindən 60 faiz aşağı düşüb.

Son həftələrdə Yaxın Şərqdəki müharibə və Hörmüz boğazı ətrafındakı risklər səbəbindən neft bazarında dalğalanma daha da güclənib.

Ekspertlər xəbərdarlıq edirlər ki, bölgədə hərbi əməliyyatların genişlənməsi halında dünya bazarında yeni enerji şoku yarana və qiymətlər daha sərt yüksələ bilər.