ABŞ-da federal hökumətin büdcə açığı, tarif gəlirlərinin təsiri ilə avqust ayında ötən ilin eyni ayına nisbətən 9% azalaraq 345 milyard dollara düşüb.

ABŞ Maliyyə Nazirliyi avqust ayına dair büdcə balansı hesabatını yayımlayıb. Hesabata görə, 2024-cü il 1 oktyabrın 1-də başlayan və 30 sentyabr 2025-də başa çatacaq 2025-ci maliyyə ilinin on birinci ayında federal hökumətin büdcə açığı 345 milyard dollar olub. Ötən ilin avqust ayında büdcə açığı 380 milyard dollar təşkil edirdi. Beləliklə, büdcə açığı avqust ayında ötən ilin eyni ayına nisbətən 9% azalıb.

Bu dövrdə bazar gözləntiləri büdcə açığının 305,7 milyard dollar olacağı yönündə idi. Hökumətin gəlirləri avqust ayında illik 12% artaraq 344 milyard dollara yüksəlib, xərcləri isə dəyişməyərək 689 milyard dollar təşkil edib.

ABŞ Prezidenti Donald Trampın tarif siyasəti çərçivəsində, avqust ayında gömrük vergilərindən əldə olunan gəlirin ötən ilin eyni dövrünə nisbətən 296% artaraq 30 milyard dollara çatması diqqət çəkib.

2025-ci maliyyə ilinin on bir ayı ərzində büdcə açığı isə ötən ilin eyni dövrünə nisbətən 4% artaraq 1 trilyon 973 milyard dollara yüksəlib. Ötən ilin eyni dövründə bu rəqəm 1 trilyon 897 milyard dollar idi.

Maliyyə ilinin on bir ayında gəlirlər ötən ilin eyni dövrünə nisbətən 7% artaraq təxminən 4,7 trilyon dollara, xərclər isə 6% artaraq təxminən 6,7 trilyon dollara çatıb.