Avropa Birliyi (AB), ABŞ mərkəzli texnologiya şirkəti “Microsoft”un söhbət və onlayn iclas platforması “Teams” ilə bağlı öhdəliklərini qəbul edərək, aparılan rəqabət araşdırmasını yekunlaşdırıb.

AB Komissiyası, “Microsoft”un “Teams” platformasında yaranmış rəqabət narahatlıqlarını aradan qaldırmaq məqsədilə verdiyi öhdəlikləri qəbul etdiyini və bu öhdəliklərin AB qaydaları çərçivəsində bağlayıcı olacağını açıqlayıb.

Qeyd olunub ki, “Microsoft”un öhdəlikləri “Teams”i “Office 365” və “Microsoft 365” paketlərində yer alan “Word”, “Excel”, “PowerPoint” və “Outlook” kimi tətbiqlərlə birləşdirməsi ilə bağlı yaranan narahatlıqları əhatə edir. Bu çərçivədə “Microsoft”, “Teams”i daxil etməyən və endirimli qiymətli paketləri də istifadəyə verəcək.

Öhdəliklərə əsasən, uzunmüddətli lisenziyaya sahib müştərilər “Teams”siz paketlərə keçə biləcək, “Teams” və bəzi “Microsoft” məhsulları ilə rəqabət aparan kommunikasiya alətləri arasında əsas funksionallıq üzrə uyğunluq təmin ediləcək, həmçinin müştərilər öz məlumatlarını “Teams”dən başqa platformalara da köçürə biləcəklər.

AB 2023-cü ildə “Microsoft”un “Teams”i “Office” ilə birləşdirərək Birlik rəqabət qaydalarını pozduğunu iddia edərək araşdırma başlamışdı. AB ölkələrində fəaliyyət göstərən şirkətlərin sektorlarında rəqabət pozuntularını yoxlama səlahiyyəti AB Komissiyasına aiddir.

Komissiya, rəqabət pozuntuları müəyyən edildikdə şirkətləri xəbərdar edir, pozuntu davam edərsə yüksək maliyyə cəzaları tətbiq edir. Bəzi hallarda şirkətlər, araşdırmanın bağlanması və cərimədən qaçmaq üçün Komissiyanın narahatlıqlarını aradan qaldıracaq öhdəliklər verərək uzlaşma yolunu seçirlər.