Bu barədə Prezident Administrasiyasının Siyasi təhlil və informasiya siyasəti şöbəsinin müdiri Elnur Aslanov Publika.Az-a açıqlamasında ATƏT DTİHB-nun Azərbaycanda keçirilən prezident seçkiləri ilə bağlı rəyinə münasibət bildirərkən deyib. 

PA rəsmisi qeyd edib ki, maraqlı fakt ondan ibarətdir ki, azad və demokratik şəraitdə İlham Əliyevə səs verən seçicilər üçün ATƏT DTİHB-un hesabatı heç bir məna kəsb etmir: “Müstəqil Azərbaycanın istənilən vətəndaşı üçün seçdiyi Prezident olub, var və olacaq. Və onun əsas məqsədi ölkənin milli maraqlarına uyğun inkişaf kursunu müəyyən etməkdir. Məhz bu səbəbdən DTİHB tərəfindən Azərbaycandakı seçki prosesinə və seçkinin özünə verilən “qiymət”i məhz siyasi riyakarlıq adlandırmaq olar”. 

E.Aslanov bildirib ki, birincisi, Azərbaycanda seçkilər xarici qüvvələrin diktəsi altında deyil, ölkənin Konstitusiyasına, Seçki Məcəlləsinə uyğun keçirilib və keçiriləcək: “İkincisi, ATƏT DTİHB adlanan beynəlxalq institutun siyasi təzyiq alətinə çevrildiyi absurd teatrı, qiymətləndirmə missiyasının müşahidəçilərinin əvvəlcədən qərəzli mövqe tutması ilə yanaşı, onların məsələyə nə qədər cəfəng yanaşmasından, son dərəcə qeyri-peşəkarlığından danışmağa əsas verir. Bu cür qiymətləndirmənin verilməsinə rəvac verən- müxalifət qəzetlərinin yazdıqları əsassız məlumatlara söykənən ATƏT DTİHB hesabatının dili və bu missiyanın seçkilərə inanılmaz səthi, ötəri yanaşmasıdır”. 

PA rəsmisi söyləyib ki, Qərb dövlətlərinin özləri ATƏT DTİHB-un əksər tövsiyələrini yerinə yetirmirlər, halbuki bu tövsiyələr ənənəvi olaraq ultimatum şəklində MDB dövlətlərinin qarşısında qoyulur. 

Onun sözlərinə görə, bu yerdə ABŞ-ın Texas ştatının hökumət rəsmiləri ilə ATƏT DTİHB-un müşahidəçiləri arasında yaşanan qalmaqalı xatırlamamaq olmur: “O zaman- 2012-ci ildə Texas ştatının prokuroru ATƏT müşahidəçilərinə seçki məntəqəsinə 30 metrdən yaxın gəlməyi qadağan etmişdi və “yerli qanunlar”ı pozanları cinayət məsuliyyəti ilə hədələmişdi. Onu da xatırlamaq yerinə düşərdi ki, Ayova, Arizona və Missisipi ştatının hökumət rəsmiləri də bu missiyaya səsvermə yerlərində görünməyini qadağan etmişdi. ATƏT-in iştirakçı dövləti kimi ABŞ-ın müşahidəçiləri seçkilərə buraxmamaq hüququ yoxdur. Amma nəticədə olan oldu. DTİHB-un missiyasının rəhbərliyi isə məsələyə elə bir tərzdə yanaşdılar ki, sanki narahatedici heç nə olmayıb. 

ATƏT-in kəskin tənqidi və ultimatum xarakterli tonu böyük olmayan dövlətlər üçündür, amma bir sıra Qərb ölkələri üçün bu ton fərqlidir, yaltaqcasınadır və hətta yalvarışlıdır.Analoji vəziyyət İrlandiyada 25 fevral 2011-ci ildə keçirilən növbədənkənar parlament seçkilərində də müşahidə olunmuşdu. O zaman bu qurum tərəfindən seçicilərin seçkilərin keçirilməsinə inamla yanaşması barədə qəribə mövqeyi səslənmişdi, halbuki İrlandiya tərəfi daha öncə səsləndirilmiş əksər iradlarla və tövsiyələrlə bağlı işlər görməmişdi”. 

E.Aslanov diqqətə çatdırıb ki, ATƏT DTİHB-un seçkilərin beynəlxalq müşahidəsinə dair qəbul etdiyi qərarlarda bu cür ikili standartlar ən azı təəccüb doğurur. PA rəsmisi hesab edir ki, nəticə etibarilə bu qurum ikili standartlar siyasəti mövqeyindən çıxış edir. Onun fikrincə, DTİHB-un bu təcrübəsi beynəlxalq seçki standartlarının və seçkilərə müşahidənin təşkili prinsiplərinin əsasını təşkil edən Kopenhagen sənədinin maddələrinə və ATƏT-in iştirakçı dövlətlərində vahid və bərabərhüquqlu şəkildə seçkilərin monitorinqinə dair müasir yanaşmalara cavab vermir. 

“Belə bir fikir yaranır ki, qurum tərəfindən seçkilərin monitorinqi birmənalı şəkildə siyasi təzyiq mexanizminə çevrilib, müşahidənin nəticələrinə dair hesabat isə seçkiləri keçirən dövlətin siyasi kursundan asılı olaraq hazırlanır. Azərbaycan ATƏT-i, bu faktın yenidən nəzərdən keçirilməsinə çağırır və DTİHB-un seçkilərin monitorinqinə dair obyektiv qiymətləndirmə mexanizminin işlənib hazırlanmasını təkid edir. Qeyd etmək yerinə düşər ki, bu ilin qışında Ermənistanda keçirilən seçkilərdə seçki qanunvericiliyinin, insan hüquq və azadlıqlarının açıq-aşkar pozulmasına, eləcə də prezidentliyə namizədlərdən birinə edilən sui-qəsdə baxmayaraq ATƏT DTİHB Avropa Parlamenti və AŞPA-nın müşahidə missiyaları ilə birlikdə seçkilərə müsbət qiymət vermişdi”-deyə PA rəsmisi bildirib. 

Şöbə müdiri əlavə edib ki, ATƏT coğrafiyasının müxtəlif yerlərində baş verən hadisələri qiymətləndirmədə bu cür “selektiv” münasibət təəssüf ki, artıq uzun müddətdir bu qurumda müşahidə olunur. Biz bu mövqeyimizi dəfələrlə bildirmişik: “Nəticə etibarı ilə biz deyə bilmərik ki, ATƏT DTİHB-un işi qərərsiz əsaslar üzərində qurulub. Lakin Azərbaycanda, 100 ölkədən 1300 müşahidəçinin iştirak etdiyi və müsbət dəyərləndirdiyi seçkilərin hamı tərəfdən müsbət qarşılanması fonunda DTİHB-nun hesabatı o qədər qərəzli oldu ki, hətta ATƏT 

nümayəndələri ilə Avropa Parlamentinin, AŞPA-nın müşahidə missiyaları arasında fikir ayrılığına səbəb oldu. Məhz bu səbəbdən yekun nəticələri əvvəl planlaşdırıldığı kimi birlikdə deyil, ayrı-ayrı elan etmək qərara alındı. Qurumun mandatına zidd olaraq, özünü yuxarı yerə qoymaqla tənbehedici danışıq tonu seçməsi və açıq-aşkar qərəzliliyi ona bir müstəqil institut kimi qalan inamı da sarsıtdı. Çoxsaylı beynəlxalq müşahidəçilər seçkilər prosesinin yüksək səviyyədə təşkil edilməsini vurğulayıblar və hansısa ciddi qanun pozuntularını qeyd etməyiblər”. 

E.Aslanov ATƏT DTİHB-un nəzərinə çatdırıb ki, İlham Əliyevin növbəti dəfə prezident seçilməsinin demokratik normalara uyğun gəldiyini vurğulayan, seçkilərin müvafiq standartlar səviyyəsində keçirilməsi ilə bağlı təbrik məktubları göndərən dövlət başçıları arasında ATƏT-ə üzv ölkələrin rəhbərləri və DTİHB-nun donorlarının da adları var. PA rəsmisi təəssüflə qeyd edir ki, Azərbaycanın imicinə zərbə vurmaq və dünya ictimaiyyətini aldatmaq üçün növbəti cəhd baş verib. 

“Heç kim iddia etmir ki, Azərbaycanda seçkilər idealdır. Ancaq buseçkilər maksimum dərəcədə açıq və şəffaf keçirilib və gənc Azərbaycan demokratiyasının yetkinliyi üçün növbəti bir imtahan olub”-deyə şöbə müdiri diqqətə çatdırıb.E.Aslanov vurğulayıb ki, 9 oktyabrda Azərbaycan xalqı öz şüurlu seçimini edib: “Bu, hər bir vətəndaşın dövlət idarəçiliyində iştirak hüququna malik olduğu və vətəndaşlara xidmətin dövlət siyasətinin əsas sütununu təşkil etdiyi müasir Azərbaycanın reallığıdır. Buna, yalnız bu prosesin diskrediyasiyasını açıq-aşkar öz qarşısına məqsəd kimi qoyan müşahidəçiləri çıxmaq şərti ilə, bizim ölkəyə seçkiləri müşahidə etməyə gələn hamı şahidlik edib. Bu gün bütün dünyadan dövlət başçıları İlham Əliyevə şəffaf və demokratik seçkilərin keçirilməsini alqışlayan və xalqın Prezidentə inam mandatını təsdiqləyən təbrik məktubları göndərməkdədir. Ölkədə bütün sahələrdə gedən inkişaf prosesinin davamlı olmasına verdiyi səsi ilə töhfə verən Azərbaycan xalqı bu seçkilərlə İlham Əliyevə dəstəyini növbəti dəfə nümayiş etdirib”.