Hüquqşünas Aslan İsmayılov Lent.az İnformasiya agentliyini məhkəməyə verib. A.İsmayılov «Elçi» qəzetinin baş redaktoru Əli Həziquliyevin qəzetdə yazdığı və adıçəkilən saytda yayımlanan «Biz hamımız kimlərinsə dostuyuq» sərlövhəli məqaləsində şərəf və ləyaqətinin alçaldılması, eləcə də işgüzar nüfuzuna xələl gətirilməsi iddiası ilə Xətai rayon Məhkəməsinə müraciət edib.

Vəkil tərəflərin hər birindən mənəvi zərərə görə 50 min manat tutulmasını və təkzib yazısının dərc edilməsini tələb edib.

Artıq məsələ ilə bağlı Xətai rayon Məhkəməsində hakim Səadət Səlimovanın sədrliyi ilə məhkəmə başlayıb və dekabrın 7-də hazırlıq, 26-da isə ilkin baxış iclası keçirilib. Növbəti iclas isə yanvarın 13-də saat 17:00-a təyin olunub.

Qeyd edək ki, məlum yazı dərc edildikdən sonra Aslan İsmayılov Lent.az-a öz mövqeyinin dərc edilməsi ilə bağlı hər hansı müraciət etməyib.

VAXT.AZ-dan: Bütün günü sosial şəbəkələrdə jurnalistlərin hüququndan, söz azadlığından, demokratiyadan danışmaqla, saytı məhkəməyə verərək, minimum əməkhaqqının 300 mislini tələb etmək necə bir araya sığa bilər? Deməli hər kəs işinə yaradığı qədər demokrat olmağı bacarır.