Rejissor Can Ulkayın filmi «Ayla» («Müharibənin qızı») filmi 2018-ci ildə «Oskar»ın xarici filmlər nominasiyası üzrə Türkiyəni rəsmi olaraq təmsil etmək üçün namizədliyini irəli sürüb.

Film, 1950-ci illərdə Koreya müharibəsində iştirak edən Süleyman adlı türk əsgər və müharibədə öldürülən ailənin yanında tapdığı və Ayla adını verdiyi kiçik koreyalı qızın ümid dolu hekayəsindən bəhs edir.

Gerçək hekayə əsasında çəkilən və qəhrəmanlarının hələ də həyatda olduğu «Ayla» filmi zaman, məkan, dil,  din, irq fərqi olmadan vicdanının insanları necə birləşdirə biləcəyini təsvir edir.

Filmdə türkiyəli əsgər öz həyatını təhlükəyə ataraq yarı donmuş vəziyyətdə olan kiçik qızı xilas edir və müharibə müddətində özü ilə birgə saxlayır. Fərqli dillərdə danışdıqlarına görə bir-birləri ilə münasibət qura bilməsələr də, onların arasında çox sıx bağ yaranır. Müharibə bitdikdən sonra evə qayıtmalı olan əsgər kiçik qızı tərk etmək istəmir, lakin gələcəkdə yenidən onu tapacağına ümid edərək Aylanı uşaq evinə verməyə məcbur olur. İkili 60 ildən sonra nəhayət ki, yenidən qovuşur.

Filmdə İsmayıl Hacıoğlu, Kim Şol (Kim Seol), Li Kyonq-Cin (Lee Kyong-Jin), Ali Atay, Murad İldırım, Taner Birsel, Meral Çetinkaya, Damla Sönməz, Sinəm Uslu, Erik Roberts, Kim Byunqsun (Kim Byoungsun), Conni Yanq, Mehmet Esən və s. aktyorlar rol alıb.