Tədqiqatçılar dəbdəbəli dəri məhsullarına alternativ olaraq dinozavr DNT-sindən dəri yaratmağa başladılar.

Dəri çantalar və ayaqqabılar kimi məhsullar heyvan hüquqlarının və ətraf mühitin müdafiəçilərinin qəzəbinə səbəb olduğundan, moda və tekstil sənayesi fərqli alternativlər inkişaf etdirir. Lakin bu məhsulların eyni zamanda həm davamlı, həm də ekoloji cəhətdən təmiz olmasını təmin etmək ciddi problem yaradır.

Üç şirkət arasında yeni əməkdaşlıq etik və davamlı bir seçim təklif etmək üçün maraqlı bir üsuldan istifadə edib.

VML marketinq və reklam agentliyi “Organoid Company” və “Lab-Grown Leather” biotexnoloji şirkətləri ilə əməkdaşlıqda “Tyrannosaurus rex” (T-rex) DNT-sindən dəri hazırlamağa başlayıb.

Elm adamları təxminən 66 milyon il əvvəl nəsli kəsilmiş “T-rex”dən daşlaşmış kollagen nümunələrindən istifadə edəcəklər. Kollagen sümüklərdə, dəridə, əzələlərdə və digər toxumalarda olan bir proteindir.

Kollagen nümunəsindən model kimi istifadə edən komanda kollagen zəncirini yaratmağı, onu DNT-yə çevirməyi və süni hüceyrələrlə birləşdirməyi planlaşdırır. Proses uğurlu olarsa, heyvan dərisinə bənzəyən bir quruluşun ortaya çıxacağı gözlənilir.

Sintetik alternativlərdən fərqli olaraq, bu üsulla dəri istehsalı laboratoriya mühitində bioloji strukturların inkişafına diqqət yetirir.

“T-rex” DNT-dən çıxarılan dəri nəsli kəsilmiş bir canlıdan alınan ilk nümunə olacaq.

Şirkətlər məhsulun davamlı olduğunu və dəbdəbəli malları əvəz edə biləcək keyfiyyətə malik olduğunu və "tam bioloji parçalana bilən" olduğunu iddia edirlər.

"Bu layihə tamamilə yeni materiallar yaratmaq üçün genom və zülal mühəndisliyindən istifadənin qeyri-adi nümunəsidir”, – “Organoid” Şirkətinin baş direktoru Tomas Mitçel deyib.

VML ilk məhsulların bu ilin sonuna qədər hazır olacağını gözlədiklərini bildirir.

Şirkət əməkdaşlığı elan edən 25 aprel tarixli bəyanatında aşağıdakı ifadələr yer alıb: “Tarixdən əvvəlki növdən hazırlanmış ilk dəri nümunəsi olan “T-rex” dərisi təkcə davamlı alternativ deyil, həm də qədim biologiyanın gələcəkdə dayanıqlı, yüksək performanslı materialları necə ilhamlandıra biləcəyini araşdırmaqda qabaqcıl bir addımdır.

2025-ci ilin sonunda buraxılması gözlənilən bu qeyri-adi məhsul həm dəbin gələcəyi, həm də etik istehsal anlayışı üçün tarixi bir dönüş nöqtəsi ola bilər”.