Katoliklərin ruhani lideri və Vatikanın rəhbəri Roma Papası Fransiskin vəziyyəti qəfil pisləşib.

Vatikan, ayın əvvəlində keçirdiyi ağır bronxit səbəbiylə 15 gündür Romadakı Gemelli Xəstəxanasında müalicə alan və ikitərəfli pnevmoniya diaqnozu qoyulan 88 yaşlı Papanın sağlamlıq vəziyyəti ilə bağlı yazılı açıqlama verib.

“Papa bronxospazm tutması keçirib. Bu, onun tənəffüs vəziyyətinin qəfil pisləşməsi ilə müşayiət olunan qusma və aspirasiyaya səbəb olub”, – deyə məlumatda deyilir.

Tənəffüs sisteminin əsas funksiyası olan qaz mübadiləsini (kifayət qədər oksigeni qəbul etmək və əmələ gələn karbon qazını adekvat şəkildə çıxarmaq) təmin etmək üçün Papaya bronxoaspirasiya aparıldığı və mexaniki ventilyasiyaya başlanıldığı və nəticədə qaz mübadiləsi ilə bağlı müsbət cavab alındığı qeyd edilib.

“Bu səbəblərə görə xəstəliyin gedişi qeyri-müəyyən olaraq qalır”, - Vatikanın bəyanatında deyilir. ifadəsindən istifadə edilmişdir.

İtaliyanın “Rainews24” kanalı Vatikan mənbələrinə istinadən xəbər verir ki, Papanın bu gün yaşadığı böhranın onun vəziyyətini pisləşdirib-pisləşdirmədiyini dəyərləndirmək üçün 24-48 saat vaxt lazım olacaq və Papa intubasiya edilmədiyi bildirilib.

Bu arada Vatikan bəyan edib ki, Papa martın 5-də, katolik dünyasının “Kül çərşənbəsi” kimi tanınan Pasxa bayramından əvvəl böyük Oruc bayramına başladığı gün keçiriləcək mərasimi idarə edə bilməyəcək.

***

Papa Fransisk fevralın 9-u və 12-də keçirilən iki ictimai tədbirdə çıxış edə bilməyib, bronxit olduğunu və nəfəs almaqda çətinlik çəkdiyini deyib və köməkçilərindən onun çıxışlarının mətnini oxumağı xahiş edib.

Fevralın 14-də Gemelli xəstəxanasına aparılan Papanın tənəffüs yollarında polimikrob infeksiyası olduğu bildirilib.

Vatikan fevralın 18-də Papanın ikitərəfli pnevmoniyaya tutulduğunu və onun klinik vəziyyətinin mürəkkəb olduğunu açıqlayıb.

Papanın həkimləri fevralın 21-də verdikləri açıqlamada Papa Fransiskin təhlükədən tam xilas olmasa da, onun həyatı üçün təhlükə olmadığını bildiriblər.

Fevralın 22-də astma tutması keçirən Papanın vəziyyətinin “kritik” olduğu bildirilib.

Vatikan fevralın 23-də elan etdi ki, “Papa başqa heç bir tənəffüs böhranı keçirməyib, yüngül başlayan böyrək çatışmazlığı var və burun vasitəsilə yüksək axınlı oksigen alır”.

Fevralın 24-də Papa Fransiskin səhhətinin kritik olaraq qaldığını, lakin bir qədər yaxşılaşmanın müşahidə edildiyini bildirən Vatikan, fevralın 25-də də vəziyyəti “kritik, lakin stabil” olaraq xarakterizə etdi.

Vatikan fevralın 26 və 27-də Papanın vəziyyətinin yaxşılaşdığını bildirib.

***

2013-cü ildən katoliklərin ruhani lideri olan Papa Fransisk ilk dəfə 2021-ci ildə Gemelli Xəstəxanasına yerləşdirilib və yoğun bağırsağından əməliyyat olunub.

Son illərdə dizindəki ağrılar səbəbilə əlil arabasından istifadə edən Papa, sonuncu dəfə 2023-cü ildə Gemelli Xəstəxanasında bir dəfə nəfəs darlığı və bir dəfə də qarın divarına protez yerləşdirmək üçün əməliyyat olunaraq iki dəfə müalicə olunub.