Ciddi əhali böhranının yaşandığı Yaponiyada problemin getdikcə pisləşdiyini göstərən daha bir məlumat yayılıb. Daxili İşlər və Rabitə Nazirliyi bu il də ölkədə uşaq sayının azaldığını bildirib.

2025-ci il aprelin 1-də 14 və daha aşağı yaşda olan uşaqların sayı 13,66 milyon olub. Ötən il bu rəqəm 350 min nəfər çox olub.

Dünən açıqlanan məlumatlar bu tendensiyanın 44 ildir fasiləsiz davam etdiyini göstərir. Yaponiyada ümumi əhalinin yalnız 11,1 faizini uşaqlar təşkil edir. Bu göstərici ABŞ-da 21,7 faiz, Çində isə 17,1 faizdir.

5 May Uşaqların Müdafiəsi Günü ərəfəsində verilən bu bəyanat doğum səviyyəsinin aşağı düşməsi və əhalinin sürətlə qocalması ilə bağlı narahatlığı artırıb.

Əhalinin sabit qalması üçün qadınların orta doğum səviyyəsi 2,1 olmalıdır. Halbuki Yaponiyada bu rəqəm son illərdə 1,3 civarında olub.

Bu, ölənlərin sayının doğumu üstələdiyi üçün ölkə əhalisinin azalmasına səbəb olur. Məsələn, 2014-cü ildə 1,62 milyon insanın öldüyü ölkədə doğulanlar bu rəqəmin yarısından az idi.

Əhalinin 20 faizindən çoxu 65 yaşdan yuxarıdır.

Əhalinin azalması işçi qüvvəsində, iqtisadiyyatda, sosial strukturda və sosial yardım sistemində problemlərin artması deməkdir.

Ölkədə evlilik təşviq edilsə də, əvvəlki illə müqayisədə artım 10 min olaraq qalıb. Boşanmaların sayında da artım var.

Ekspertlər əhalinin azalmasının ən azı daha 20-30 il davam edəcəyini gözləyirlər. Yaponiya əhalisinin 2024-cü ildəki 123,4 milyondan 2065-ci ildə 88 milyona qədər azalacağı təxmin edilir.

Doğuş göstəricilərinin artırılması üçün 4 günlük iş gününə keçid, nikah və uşaqların həvəsləndirilməsi, uşaq baxım mərkəzlərinin sayının artırılması kimi tədbirlər həyata keçirilir. Lakin yaşayışın baha olması, aşağı maaş, çətin iş şəraiti və ölkənin dar yaşayış sahələri kimi problemlər bu stimulları kölgədə qoyur.

Çin, Honq-Konq, Tayvan və Cənubi Koreya kimi region ölkələri də eyni şəkildə əhali problemi ilə mübarizə aparır.

Eyni problem İspaniya və İtaliya kimi Avropa ölkələrində də yaşansa da, problem immiqrasiya yolu ilə həllini tapır.