ABŞ prezidenti Donald Trampın Ukrayna müharibəsi ilə bağlı sərt açıqlamaları və aqressiv ticarət siyasəti Fransada Amerika məhsullarının boykot edilməsi çağırışlarını artırıb.

Fransa prezidenti Emmanuel Makron Avropa Birliyi (AB) ölkələrini Amerika məhsulları əvəzinə Fransa və Avropa istehsalı olan məhsulları almağa çağırıb. Ölkədə istehsal olunan “Coca-Cola”, “McDonald's”, “Amazon” kimi nəhəngləri boykotla hədələyirlər. Lakin ekspertlər xəbərdarlıq edirlər ki, bu mürtəce addım Fransa iqtisadiyyatına zərər verə bilər: “400 min fransız işini itirə bilər, qiymətlər arta bilər!”

Çünki Fransada istehlak edilən bir çox Amerika markalı məhsullar əslində ölkə daxilində istehsal olunur. Məsələn, “Mars Group”un “M&M's” konfetləri Elzas bölgəsində, “Ariel” yuyucu kapsulları Amiensdə və “Häagen-Dazs” dondurmaları Arras yaxınlığında istehsal olunur. Başqa sözlə, bu boykot edilmiş brendlər minlərlə fransız işçini işlə təmin edir.

Məlumatlara görə, Fransada Amerika şirkətlərinin 4500-dən çox filialı var və təxminən 400.000 işçi çalışır. Təkcə “McDonald's”da ölkədə 79 min insan çalışır. “Coca-Cola”, “PepsiCo”, “KFC” və “Amazon” kimi nəhənglər də Fransada minlərlə insana iş imkanı yaradır.

İqtisadçılar deyirlər ki, Amerika məhsullarını boykot etmək simvolik olaraq qalacaq və geniş təsir göstərə bilməyəcək. Həmçinin, fransız istehlakçıları Amerika məhsullarına alternativ olaraq yerli məhsulları seçərkən daha yüksək qiymətlər ödəməyə hazırdırlarmı? Xüsusilə alıcılıq qabiliyyətinin aşağı düşdüyü bu dövrdə bu sualın cavabı qeyri-müəyyən olaraq qalır.