Təhsil naziri Mikayıl Cabbarov dərs ilinin uzadılması ilə bağlı müzakirələrə son qoyub. Vaxt.az-ın məlumatına görə, nazir bildirib ki, dərs ilinin uzadılmasının iki əsas səbəbi var.

«Birincisi, müasir təhsil sistemləri ilə müqayisədə Azərbaycan şagirdləri təxminən 8 həftə az tədris keçirlər. Akademik tədrisdə 8 həftə çox uzun müddətdir. Təbii olaraq biz tədris ilinin 8 həftəlik uzadılmasını nəzərdə tutmuruq. Amma aydındır ki, dərs ilinin bu qədər qısa olması nəticə etibarilə şagird nailiyyətlərinə təsirsiz ötmür. Müəyyən mənfi təsirləri var. İkinci səbəb bundan ibarətdir ki, eyni fənlərin, və ya akademik proqramların keçirilməsi tədris ili qısa olduğu zaman bir günə və ya bir akademik həftəyə toplanır, bu da şagirlərin daha çox yüklənməsinə səbəb olur. Bizim tədris yükünün optimallaşdırılması üçün qəbul edəcəyimiz qərar bu istiqamətdə müsbət təsir göstərəcək».

Təhsil naziri şagirdlərin sinifdən-sinfə keçirilməsi ilə bağlı yeni qərardan haqda da danışıb. Mikayıl Cabbarov jurnalistlərə açıqlamasında qeyd edib ki, şagirdlərin sinifdən-sinfə keçirilməsində əsas məqsəd təhsilin keyfiyyətinin təmin olunmasıdır. «Burada məntiq çox sadədir. Bu qərara əsasən, bir sıra fənlər üzrə qeyri-kafi qiymət alan şagirdlərin növbəti sinfə keçirilməsi məqsədəuyğun hesab edilmir. Fərz edin ki, əgər şagird 8-ci sinif proqramını mənimsəmirsə, onun 9-cu sinifdə uğurla təhsil alması təbii olaraq suallar doğurur. Formallıq hesabına şagirdi sinifdən-sinfə keçirməklə biz nə şagirdə, nə təhsil sisteminə, nə də nəticə etibarilə vətəndaş kimi həyatda yer tapmasına xidmət etmirik».

Nazirin sözlərinə görə, Təhsil Nazirliyinin təşəbbüsü ilə 9-11-ci siniflərdə istər attestatların, istərsə də şəhadətnamələrin verilməsi təmin olunur: «Bu nöqteyi-nəzərdən liberal yanaşmanın tərəfdarıyıq. Bu təbii olaraq təhsilin keyfiyyətinin azaldılması hesabına həyata keçirilə bilməz. Təhsil sistemi keyfiyyətli təhsil verməyə xidmət etməlidir. Qərarın arxasında duran fəlsəfə də budur».

Mikayıl Cabbarov eyni zamanda məktəblərdə ilahiyyat dərslərinin keçirilməsinə də münasibət bildirib. O qeyd edib ki, bu məsələ gündəmdə deyil.