Katoliklərin ruhani lideri və Vatikanın prezidenti Papa Fransiskin sağlamlıq vəziyyətinin son 24 saatda bir qədər yaxşılaşdığı bildirilir.

Vatikan, ayın əvvəlində keçirdiyi ağır bronxit səbəbiylə 13 gündür Romadakı Gemelli Xəstəxanasında müalicə alan və orada ikitərəfli pnevmoniya diaqnozu qoyulan 88 yaşlı Papanın sağlamlıq vəziyyəti ilə bağlı yazılı açıqlama verib.

Açıqlamada deyilir: “Papanın kliniki vəziyyəti son 24 saatda bir qədər yaxşılaşıb. Onun son günlər yaşadığı yüngül böyrək çatışmazlığı aradan qalxıb. Dünən axşam aparılan döş qəfəsinin KT müayinəsində pnevmoniyanın normal irəlilədiyi məlum olub. Bu gün aparılan qan və hematoloji analizlər dünənki yaxşılaşmanı təsdiqləyib”.

Katoliklərin ruhani lideri üçün yüksək axınlı oksigen müalicəsinin davam etdiyi, Papanın bu gün astma kimi tənəffüs tutması keçirmədiyi, tənəffüs fizioterapiyasının davam etdiyi bildirilib.

Açıqlamada qeyd olunub ki, Papa bir qədər sağalsa da, həkimlər xəstəliyin gedişatını qiymətləndirməkdə ehtiyatlı olublar.

Vatikanın bu gün səhər verdiyi açıqlamada Papanın gecəni sakit keçirdiyi qeyd edilib.

Papa fevralın 14-dən xəstəxanada müalicə alır

Papa Fransisk fevralın 9-u və 12-də keçirilən iki ictimai tədbirdə çıxış edə bilməyib, bronxit olduğunu və nəfəs almaqda çətinlik çəkdiyini deyib və köməkçilərindən onun çıxışlarının mətnini oxumağı xahiş edib.

Fevralın 14-də Gemelli xəstəxanasına aparılan Papanın tənəffüs yollarında polimikrob infeksiyası olduğu bildirilib.

Vatikan fevralın 18-də Papanın ikitərəfli sətəlcəm xəstəliyinə tutulduğunu və onun klinik vəziyyətinin mürəkkəb mənzərə yaratdığını elan etdi.

Papanın həkimləri fevralın 21-də verdikləri açıqlamada Papa Fransiskin təhlükədən tam xilas olmasa da, onun həyatı üçün təhlükə olmadığını bildiriblər.

Fevralın 22-də astma tutması keçirən Papanın vəziyyətinin “kritik” olduğu bildirilirdi.

Vatikan fevralın 23-də elan etdi ki, “Papa daha bir tənəffüs böhranı keçirməyib, yüngül başlayan böyrək çatışmazlığı var və burun vasitəsilə yüksək axınlı oksigen alır”.

Fevralın 24-də Papa Fransiskin sağlamlıq vəziyyətinin kritik olaraq qaldığını, lakin bir qədər yaxşılaşmanın müşahidə edildiyini bildirən Vatikan dünən vəziyyəti “kritik, lakin sabit” olaraq xarakterizə etdi.

Son illər sağlamlıq problemləri artıb

2013-cü ildən katoliklərin ruhani lideri olan Papa Fransisk ilk dəfə 2021-ci ildə Gemelli Xəstəxanasına yerləşdirilib və yoğun bağırsağından əməliyyat olunub.

Son illərdə dizindəki ağrılar səbəbilə əlil arabasından istifadə edən Papa, sonuncu dəfə 2023-cü ildə Gemelli Xəstəxanasında bir dəfə nəfəs darlığı və bir dəfə də qarın divarına protez yerləşdirmək üçün əməliyyat olunaraq iki dəfə müalicə olunub.