Şənbə günü Serbiyanın paytaxtı Belqradda minlərlə etirazçı ölkədə böyük iğtişaşlara səbəb olan beton örtünün uçması nəticəsində həlak olanların xatirəsini bir dəqiqəlik sükutla yad ediblər.

Serbiya prezidenti Aleksandr Vuçiçə və onun hökumətinə qarşı aylarla davam edən etirazların kulminasiya nöqtəsi kimi qiymətləndirilən mitinqdə 100 mindən çox serb iştirak edib.

Bayraq qaldıran böyük izdihamlı etirazçılar yağışlı havaya baxmayaraq paytaxtın mərkəzini bağlayıblar. İnsanlar hərəkət etməkdə çətinlik çəkib və bir çoxları planlaşdırılan etiraz meydanından yüzlərlə metr kənarda qalıblar.

Etirazlar dörd ay əvvəl Serbiyanın şimalında dəmiryol vağzalında beton tentenin uçması və 15 nəfərin ölümündən sonra başlayıb. Bu faciəyə cavab olaraq demək olar ki, hər gün nümayişlər keçirilirdi.

Serbiyada bir çoxları hadisəni hökumətin geniş yayılmış korrupsiyası, səhlənkarlığı və tikinti təhlükəsizliyi qaydalarına əməl edilməməsi ilə əlaqələndirib. Etirazçılar bu faciəyə görə məsuliyyət daşıyanların məsuliyyətə cəlb olunmasını tələb edirlər.

Mitinq həm də on ildən artıqdır ki, vəzifədə olan Vuçiç üçün ilk böyük problem kimi qiymətləndirilir.

Şənbə günü keçirilən mitinq “15 üçün 15” adı verilib, etirazın tarixinə və noyabrın 1-də ölkənin şimalındakı Novi Sad şəhərində tentenin uçması nəticəsində ölənlərin sayına istinad edilib. Axşam saatlarında izdiham qurbanların xatirəsini 15 dəqiqə sükutla yad edib.

Polis izdihamı 107 min nəfər hesab etsə də, müstəqil Serbiya mediası bu rəqəmin daha çox olduğunu və mitinqin ölkədəki ən böyük etiraz aksiyası olduğunu bildirib.

Polis həmçinin bildirib ki, nümayiş əsasən dinc şəraitdə keçib və heç bir ciddi insident qeydə alınmayıb. Etirazçılar Vuçiç tərəfdarlarını dinc atmosferi pozmaqda və toqquşmaları qızışdırmaqda ittiham edirlər.

Mitinqdə iştirak edən Belqrad sakini Svetlana Muro, “Bugünkü aksiya cənab prezident (Aleksandar Vuçiç) və onun itaətkarları (tərəfdarları) insidentlər və mümkün qan tökülmələri törətmək üçün öz təxribatçılarını göndərənə qədər tamamilə dinc keçdi”, – deyib.

Mitinqlə bağlı danışan Serbiyanın baş naziri Aleksandr Vuçiç deyib ki, zorakılıq və vandalizmə təhrik edən 20-yə yaxın adam həbs edilib.

“İyirmi iki nəfər özgənin əmlakına və Serbiya Respublikasının əmlakına qarşı cinayət törətdiklərinə, habelə polis əməkdaşlarına və digər şəxslərə hücum etdiklərinə görə həbs ediliblər”.

Serbiya prezidenti xalqın iradəsini də etiraf edib və hökuməti etirazçıların mesaj və tələblərinə qulaq asmağa çağırıb: "Biz mesajı yaxşı başa düşdük və bu qədər insan bir araya gələndə iqtidardakıların hamısı mesajı başa düşməlidir. Biz özümüzü dəyişdirməli və çox şey öyrənməli olacağıq".

Vuçiç onu da əlavə edib ki, ona aydındır ki, serblər dəyişiklik istəyirlər: “Serbiya vətəndaşları seçkilərdə hökuməti dəyişmək istəyir”.