Noyabrın 1-də “Novi Sad” qatar stansiyasında 15 nəfərin öldüyü qəzadan sonra başlayan tələbə nümayişləri yanvarın 28-də Serbiyanın baş naziri Miloş Vuçeviçin istefasına səbəb olsa da, etirazlar səngimək bilmir.

Hökumətə qəzəbli olan tələbələr Belqraddan başladıqları iki günlük yürüşdən sonra həftə sonu “Novi Sad”a daxil olublar.

Dunay çayını əhatə edən üç böyük körpü həftə sonu on minlərlə etirazçı tərəfindən bağlanıb.

ABŞ “New York Times” (NYT) qəzetinin Mərkəzi və Şərqi Avropa Bürosunun rəhbəri Endryu Hiqqins xəbər verir ki, üç aydır bu cür hərəkətlərə məhəl qoymayan Serbiya Yayım Korporasiyası indi mövqeyini dəyişib.

Son vaxtlara qədər prezident Aleksandar Vucicin ruporu hesab edilən ictimai televiziyanın Novi Saddakı nümayişləri xəbər bülletenlərinə əlavə etdiyi bildirilir.

Hiqqins vurğulayır ki, keçmişdən fərqli olaraq, etirazçılar artıq “xarici kəşfiyyat orqanlarına çalışan muzdlu satqınlar” və ya “müxalifətin marionetləri” kimi göstərilmir.

2017-ci ildən vəzifədə olan Serbiya prezidenti Aleksandr Vuçiçin Serbiya Tərəqqi Partiyası (SNS) şənbə günü axşam dəyişikliklə bağlı bəyanat yayıb və ictimai televiziyanın xəbərini “qalmaqallı” adlandırıb.

“Onlar Serbiya Respublikasının konstitusiya quruluşunu məhv edən siyasətçilərin tərəfinə keçərək jurnalist peşəsindən iyrənc şəkildə sui-istifadə ediblər”, – SNS bildirib.

Keçmiş prokuror Jasmina Paunovic NYT-yə deyib ki, “Bu kiçik, lakin potensial olaraq inqilabi dəyişiklikdir”.

O, hökumət tərəfdarlarının əyalətdəki işlərini itirəcəkləri və cəzalandırılacaqları səbəbindən “qorxudan titrədiklərini” iddia edib.

1990-cı illərin sonundan bəri ən böyük etiraz aksiyalarının keçirildiyini bildirən NYT, özəl sektordakı böyük nəşriyyatların da hökuməti dəstəklədiyinə diqqət çəkib.

Tələbələr vağzalda ölümlə nəticələnən qəzaya görə məsuliyyət daşıyanların cəzalandırılmasını, səhlənkarlıqda şübhəli bilinən stansiyanın tikinti və təmir işləri ilə bağlı bütün sənədlərin dərc olunmasını, əvvəlki nümayişlərdə saxlanılan tələbə və akademiklərin azad edilmələrini istəyib.

Lakin ekspertlər vurğulayırlar ki, bu tələblər yerinə yetirilsə belə, etirazçıların avtoritarizm və korrupsiyaya qarşı aksiyaları davam edə bilər.