Neft iyunun sonundan bəri ən böyük həftəlik enişə doğru irəliləyir. OPEC+ iclası ərəfəsində dayandırılmış hasilatların yenidən işə salınacağı gözləntiləri fonunda bazarda təklif bolluğu ilə bağlı narahatlıqlar artır. Bu səbəbdən qiymətlər iyunun sonundan bəri ən kəskin həftəlik geriləməyə doğru gedir.

“Brent” markalı neftin bir bareli təxminən 64 dollara qədər enmişdi, həftəlik itki isə təxminən 8% təşkil edir. ABŞ xam nefti (WTI) isə 60 dollardan bir qədər yuxarıdan qərarlaşmışdı. Bakı vaxtilə 09:40-a olan məlumata görə, “Brent” 0.48 (0.75%) bahalaşaraq 64,59 dollara, “WTI” isə 0.47 (0.78%) bahalaşaraq 60.94 dollara satılır. Bu arada Azərbaycan brendi “Azeri light” 0,65 və ya 0.89% ucuzlaşıb. Buna baxmayaraq, Azərbaycan nefti dünyada ən bahalı neftdir və alıcılara 72.77 dollardan təklif edilir.

OPEC+ noyabr ayı hasilatı ilə bağlı qərar qəbul etmək üçün bazar günü onlayn toplantı keçirəcək və qrup bazar payını bərpa etmək məqsədilə hasilat artımlarını sürətləndirmə ehtimalını müzakirə edə bilər.

Beynəlxalq Enerji Agentliyi (IEA) təklif bolluğunun gələn il rekord həddə çatacağını proqnozlaşdırır. Bəzi “Wall Street” bankları isə “Brent”in bir barelinin 50 dollara qədər ucuzlaşa biləcəyini bildirir.

“Bloomberg” sorğusuna əsasən, Neft İxrac Edən Ölkələr Təşkilatı (OPEC) sentyabr ayında hasilatı gündə 400 min barel artıraraq 2023-cü ildə qrup və onun müttəfiqləri tərəfindən tətbiq edilən hasilat ixtisarlarını rəsmi olaraq ləğv edib. Səudiyyə Ərəbistanı hasilatı tam olaraq OPEC+ kvotasına uyğun şəkildə artırıb.