Layihə üzrə növbəti fazaların başlandığını göstərmək üçün Trans-Adriatik Boru Kəməri (TAP) layihəsinin yeni loqosu və vebsaytı hazırlanıb. Bu barədə layihənin rəsmi vebsaytında məlumat verilib.

Saytda boru kəmərinin keçdiyi Yunanıstan, İtaliya, Albaniya kimi tranzit ölkələr üçün təfərrüatlı, yenilənmiş və müvafiq informasiya yerləşdiriləcək.

Vebsaytda servitut prosesi (layihə üçün yerin alınması), təchizatın vəziyyəti və TAP-ın gətirəcəyi faydalarla bağlı məlumat əlavə olunacaq. Vebsayt həmçinin TAP-ın bir çox beynəlxalq pay sahibləri üçün əlverişli ictimai resurs olacaq.

Qeyd edək ki, 870 kilometr uzunluğu olan boru kəmərinin inşasına hazırlıqlar davam edir. Azərbaycan təbii qazını Avropa bazarlarına çatdıracaq TAP layihəsi strateji Cənub Qaz Dəhlizinin ən mühüm elementlərindən biri olacaq.

TAP layihəsi üzrə boru kəmərinin inşası 2016-cı ildə başlayacaq. Bunun üçün hazırlıq işləri davam edir. Layihə üzrə Albaniyada yolların və körpülərin inşası isə 2015-ci ildə başlayacaq.

TAP layihəsinin xarici əlaqələr üzrə direktoru Maykl Hoffmann: «Layihənin növbəti həyəcanlı mərhələsinə keçid aldığımız bir vaxtda TAP-ın vizual imicinin olması çox vacibdir. Yeni imic dinamik və mütərəqqi layihəni çox doğru təmsil edir və layihənin bütün pay sahibləri tərəfindən aydın seçilir. Yeni vebsaytın məqsədi yerli, milli və beynəlxalq pay sahibləri üçün etibarlı mənbə olmaq, TAP layihəsinin bütün aspektləri haqqında onları vaxtında və dəqiq məlumatlandırmaqdır».

Trans-Adriatik Boru Kəməri (TAP) haqqında

TAP layihəsinin köməyi ilə təbii qaz Azərbaycanın nəhəng «Şahdəniz-2» yatağından Avropaya nəql olunacaq. Təxminən 870 km uzunluğunda olan boru kəməri Yunanıstan-Türkiyə sərhəddində - Kipoda Trans-Anadolu Boru Kəmərinə (TANAP) birləşəcək. Buradan da Yunanıstan, Albaniya və Aralıq dənizindən keçərək İtaliyanın cənubuna çatacaq.

TAP layihəsi marşrut boyunca iqtisadi inkişafa və yeni iş yerlərinin açılmasına kömək edəcək; birbaşa xarici investisiyalar üçün əsas mənbə olan bu layihə heç bir qrant və maddi yardımlardan asılı deyil. Təbii qaz ilk dəfə 2018-ci ilin sonlarında Gürcüstan və Türkiyəyə satılacaq. Avropaya isə ilk təbii qaz nəqli təxminən bir il sonra olacaq.

TAP layihəsi üzrə pay bölgüsü belədir: BP (20 faiz), ARDNŞ (20 faiz), «Statoil» (20 faiz), «Fluxys» (16 faiz), «Total» (10 faiz), E.ON (9 faiz) və «Axpo» (5 faiz).