Çinli sürətli moda pərakəndə satış şirkəti “Shein Group Ltd.” kiçik paketlərə tətbiq edilən tariflərdən əvvəl geyimdən tutmuş mətbəx qablarına qədər ABŞ-da satdığı məhsullarının qiymətlərini qaldırdı.

“Bloomberg News”un tərtib etdiyi məlumatlara görə, ABŞ-da qiymət artımlarının əksəriyyəti aprelin 25-də baş verib. Bəzi kateqoriyalar digərlərindən əhəmiyyətli dərəcədə yüksək artımlar görüb.

Gözəllik və sağlamlıq kateqoriyasında ən çox satılan 100 məhsulun orta qiyməti aprelin 24-dən etibarən 51 faiz artıb, bəzi maddələrin qiyməti iki dəfədən çox bahalaşıb.

Ev və mətbəx məhsulları və oyuncaqlar üzrə orta artım 30 faizdən çox olub. Bu artıma 10 ədəd mətbəx dəsmal dəstinin qiymətində 377 faiz kütləvi artım səbəb olub.

Qadın geyimlərində artım 8 faiz olub. Dünən ABC-yə danışan ABŞ Maliyyə Naziri Skott Bessent Tramp administrasiyasının Çindən başqa 17 əsas ticarət tərəfdaşı ilə ticarət danışıqları apardığını və danışıqların, xüsusilə Asiya ölkələri ilə çox yaxşı getdiyini bildirib.

Bessent, Çinin ABŞ-ın tətbiq etdiyi 145 faizlik tarif dərəcəsini ödəyə bilmədiyi üçün danışıqlar aparmağa məcbur olacağı ilə bağlı Ağ Ev ritorikasını təkrarladı: “Onların biznes modeli ABŞ-a ucuz, subsidiyalaşdırılmış mallar satmağa əsaslanır”.