Almaniyanın lift istehsalçısı “Böcker” Fransada baş verən böyük “Louvre” Muzeyi oğurluğundan sonra dünya mediasının diqqət mərkəzinə düşüb. Səbəb isə soyğunçuların muzeyə girmək üçün məhz şirkətin istehsalı olan səyyar yük lifti (“Böcker Agilo”)ndan istifadə etməsidir.

Şimali Reyn-Vestfaliya əyalətində fəaliyyət göstərən ailə şirkəti “Böcker” hazırda sosial şəbəkələrdə də geniş müzakirə olunur.

Ötən həftə kimliyi bilinməyən 4 nəfər Luvr Muzeyinin qarşısına platformalı yük maşını saxlayıb. Onlar maşında quraşdırılmış “Böcker” markalı qaldırıcı vasitəsilə muzeyin terrasına qalxaraq içəri daxil olublar və cəmi 7 dəqiqə ərzində 88 milyon avro dəyərində zinət əşyalarını oğurlayıblar.

Hadisədə istifadə olunan liftin görüntüləri sosial şəbəkələrdə qısa müddətdə viral olub.

Şirkət rəhbərliyi isə hadisəyə gözlənilməz şəkildə yumorla yanaşıb. “Böcker” rəsmi hesabında hadisə yerindən çəkilmiş bir fotonun üzərinə “Sürətli olmanız gərəkəndə ‘Böcker Agilo’ xəzinələrinizi 400 kiloqrama qədər, dəqiqədə 42 metr sürətlə daşıyır – həm də fısıltı kimi səssiz”, – yazaraq paylaşım edib.

Şirkətin baş direktoru Aleksandr Böcker (Alexander Böcker) AFP-yə açıqlamasında, “Bu cür cinayət, əlbəttə ki, qəti şəkildə qınanmalıdır, lakin biz hadisəyə bir az yumorla yanaşmaq istədik”, – deyib.

O, həmçinin əlavə edib ki, “Dünyanın ən məşhur muzeyinin adı çəkilərkən şirkətimizin diqqət mərkəzinə gəlməsi də bizim üçün kiçik bir fürsət idi”.

Şirkətin paylaşımı sosial mediada böyük rezonans doğurub.