Almaniyada hər üç şirkətdən biri iqtisadi yavaşlama səbəbindən bu il ixtisar etməyi planlaşdırır. Köln İqtisadi Tədqiqatlar İnstitutunun (IW) sorğusuna görə, şirkətlərin təxminən 35 faizi iş yerlərini ixtisar etməyi planlaşdırır. Lakin ötən payızda bu rəqəm bir qədər yüksək olub, 38 faiz təşkil edib. Eyni zamanda, daha çox iş yeri yaratmağı planlaşdıran şirkətlərin payı 17 faizdən 24 faizə yüksəlib.

Mart və aprel aylarında keçirilən altı aylıq iqtisadi sorğuda 2000-dən çox şirkət iştirak edib. Şirkətlərin 35 faizi bu il keçən illə müqayisədə daha az sərmayə qoymaq istəyir. Payızda bu göstərici daha da yüksək olub, 40 faiz təşkil edib. Eyni şəkildə, daha yüksək sərmayə gözləyən şirkətlərin nisbəti yüzdə 23-dən yüzdə 28-ə yüksəldi.

***

“IW”nin məlumatına görə, ABŞ prezidenti Donald Trampın Avropa Birliyi və onlarla başqa ölkədən gələn mallara yüksək rüsumlar tətbiq edəcəyi barədə açıqlaması sorğu zamanı hələ aktiv deyildi. Amma onlar artıq ixrac mühitini zəhərləmişdilər. “Tarif müharibəsi gündəlik işlərə böyük təsir göstərir. Donald Trampın şıltaqlıqları uyğun olmayan bir zamanda gəlib və Almaniya iqtisadiyyatı üçün ciddi bir sınaqdır”, – “IW”-nin İqtisadiyyat direktoru Michael Grömling deyib.

“IW”nin məlumatına görə, Almaniyada ABŞ-ın aprelin 2-də elan etdiyi cəza tariflərinin səbəb olduğu iqtisadi məhsul itkisi dörd il ərzində təxminən 200 milyard avroya çata bilər. Buna görə də yeni Almaniya hökuməti şirkətlərə bu qeyri-müəyyən vaxtlarda mümkün qədər sabitlik təmin etmək üçün AB ilə sıx koordinasiyada əks tədbirlər görməlidir.

***

Şirkətlər 2023-cü ilin payızından bəri iş vəziyyətinə pessimist yanaşırlar: o vaxtdan bəri sorğu optimistlərdən daha çox pessimistlər qeydə alıb. Hazırda şirkətlərin 18 faizi biznesin vəziyyətinin bir il əvvəlkindən yaxşı olduğunu, 40 faizi isə daha da pisləşdiyini deyir. Vəziyyətin müsbət və mənfi qiymətləndirilməsi arasındakı fərq 2024-cü ilin payızındakı -33 ilə müqayisədə 2025-ci ilin yazında -22 faiz bəndindədir.

“Vəziyyət yaxşılaşıb, lakin ümumilikdə pis olaraq qalır”, – deyə “IW” iqtisadi sorğunun nəticələrini yekunlaşdırıb. Xüsusilə tikinti və sənaye sahələrində vəziyyət hələ də ağırdır. Bu sektorlar tənəzzüldədir. Yalnız xidmət sektorunda pessimistlərdən daha çox optimistlər var.