Almaniya kansleri Fridrix Mers (Friedrich Merz) Avropa Birliyinin gələcəkdəki rolu ilə bağlı diqqətçəkən açıqlamalar verib.

Federal Məclisdə çıxış edən Mers bildirib ki, Avropa yalnız iqtisadi və ya siyasi birlik kimi deyil, hərbi baxımdan da güclü bir aktor halına gəlməlidir: “Güc olmadan sülhü qoruya bilmərik. Zəiflik sülhü təhlükəyə atır”, – deyərək hərbi potensialın əhəmiyyətinə diqqət çəkib.

Mersin sözlərinə görə, Avropa artıq klassik sülh layihəsi anlayışının hüdudlarını aşmalıdır. Onun fikrincə, Avropa Birliyi qlobal miqyasda təsirli bir sülh gücünə çevrilməlidir. Lakin bu, yalnız xoş niyyətlə deyil, güclü iqtisadiyyat, aydın siyasi iradə və çəkindirici hərbi güc sayəsində mümkündür.

Almaniya kansleri qeyd edib ki, heç bir Avropa ölkəsi təkbaşına bu gücə malik deyil, ancaq birlik daxilində hərəkət edildiyi təqdirdə dünya miqyasında proseslərə yön vermək olar.

Mers İsraillə HƏMAS arasında əldə olunan atəşkəs razılaşmasını misal göstərərək, diplomatiyanın hələ də güclü bir vasitə olduğunu vurğulayıb. Bununla belə, o əlavə edib ki, bəzi hallarda yalnız diplomatik yolla nəticə əldə etmək mümkün olmur.

Avropa liderlərinin qətiyyətli və birlikdə hərəkət etməsi halında sülhün qoruna biləcəyini bildirən Mers, sonda qeyd edib ki, siyasi iradə ilə yanaşı, lazım gələrsə hərbi güc tətbiq edə bilən bir Avropa formalaşdırmaq zəruridir.