ABŞ-ın Ukrayna müharibəsinə son qoyması və Rusiya ilə yaxınlaşması NATO-da dərin sarsıntılar yaradıb. Amerikanın “The Wall Street Journal” (WSJ) qəzeti yazır ki, ABŞ prezidenti Donald Trampın Rusiya ilə yaxınlaşma istiqamətində atdığı addımlar “onilliklər boyu davam edən Qərb siyasətinə ziddir”.

NATO təxminən 76 il əvvəl ABŞ və onun müttəfiqləri tərəfindən Sovet Rusiyasına qarşı yaradılıb. Alyans ABŞ-ın hərbi gücündən, o cümlədən nüvə arsenalından hücuma məruz qalan istənilən müttəfiqini müdafiə etmək üçün istifadə edəcəyi ideyasına əsaslanır. Lakin təhlil göstərir ki, bu əsas prinsip indi sual altındadır.

NATO-nun Avropadakı Müttəfiq Qüvvələrinin keçmiş Ali Baş Komandanı Ceyms Stavridis alyansın çox çətin bir dövrdən keçdiyini qeyd edir: “Qorxuram ki, biz NATO-nun son günlərini yaşayırıq”.

Təhlildə deyilir ki, NATO-ya üzv olan Avropa ölkələrinin uzunmüddətli perspektivdə nə özlərini, nə də Ukraynanı müdafiə edə biləcək mürəkkəb hərbi sistemləri yoxdur. Bildirilir ki, NATO daxilində əmək bölgüsündə bu rol uzun müddətdir ki, ABŞ-ın üzərinə düşüb.

2016-2019-cu illərdə NATO baş katibinin ilk qadın müavini vəzifəsində çalışmış ABŞ diplomatı Rouz Qottemüller deyib: “Avropalılar narahat olmaq və öz hərbi sənayelərini və imkanlarını qurmaqda müdrikdirlər”.

Avropa Birliyinin Təhlükəsizlik Araşdırmaları İnstitutundan Cüzeppe Spatafora deyir ki, müttəfiqləri ABŞ-ın dəstəyini geri çəkməsinə hazır olmalıdır.

“Reuters” bu gün Vaşinqtonun Moskvaya qarşı sanksiyaları yumşaltmağı planlaşdırdığını bildirib.

Bundan əlavə, fevralın 24-də Birləşmiş Millətlər Təşkilatının Baş Assambleyasında (BMGK) keçirilən səsvermədə ABŞ və Rusiya Ukraynada müharibənin dayandırılmasını tələb edən qanun layihəsinin əleyhinə səs veriblər. Co Bayden administrasiyası dövründə Vaşinqton BMT Təhlükəsizlik Şurasının iclaslarında Ukrayna müharibəsi ilə bağlı layihələrdə Rusiyaya qarşı çıxıb.

Tramp və Ukrayna prezidenti Vladimir Zelenski fevralın 28-də Ağ Evdə görüşüb və iki lider arasında qızğın müzakirələr aparılıb. Bu səbəbdən də Vaşinqtonla Kiyev arasında nadir torpaq elementləri üzrə mədən sazişi imzalana bilmədi. Çətin görüşdən sonra ABŞ dünən Ukraynaya bütün hərbi dəstəyin dayandırıldığını açıqladı.

Digər tərəfdən, Rusiya prezidenti Vladimir Putin nadir torpaq elementləri sahəsində ABŞ-la birgə işləməyə hazır olduqlarını bildirib.