Respublikanın aran rayonlarında taxıl biçini başlayıb. Proses ciddi problemlə müşayiət olunur. Fermerlər bildirirlər ki, kombayn çatışmazlığı var və bu, məhsuldarlığın aşağı düşməsinə səbəb olur. Həmçinin bu il məhsuldarlığın aşağı düşməsi də ciddi problem hesab olunur. Kombayn olmaması səbəbindən bölgələrdə arpa biçini də ləngiyir.

Kənd Təsərrüfatı Nazirliyi isə məsələ ilə bağlı açıqlama verib.
İyunun 18-nə qədər payızlıq və yazlıq dənli və dənli paxlalı biktilərin biçini 21 faiz təşkil edir. Bu barədə “Yeni Müsavat”a Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev məlumat verib. O bildirib ki, biçiləcək 1279 min hektar sahənin 217477 hektarı, yəni 21 faizi biçilib. Ümumlikdə isə 518841 ton məhsul istehsal olunub. Məhsuldarlıq hər hektardan 23,9 sentner təşkil edir.
Buğda biçininə gəldikdə isə ümumi sahənin, yəni 690611 hektar ərazinin 67538-i, yəni cəmi 10 faizi biçilib.
Qeyd edək ki, 2013-cü il iyunun 1-nə olan məlumata görə isə bitkiçilik məhsullarının yığımı 23693 hektar təşkil edir. Qarğıdalı buraya daxil deyil. Ümumilikdə 57050 ton məhsul yığılıb ki, məhduldarlıq 24,1 sentner edir.
M.Hacıyev bölgələrdə kombayn çatışmazlığına da aydınlıq gətirib: “Kombayn ümumilikdə 2660 ədəd var. Onlardan biçində 2600-ü iştirak edir. 1240 kombayn yenidir, yeni gətirilib. 1360-ı isə köhnədən qalanlardır, 20 ildən artıq istifadə olunur. Bu il artıq fermerlərə 40 yeni kombayn verilib, 60 kombayn da tezliklə veriləcək. Bölgələrdə kombayn çatışmamazlığı ilə bağlı nazirlik rəhbərliyi müzakirə aparıb, qaynar xətt yaradılıb. ”Aqrolizinq"ə tapşırılıb ki, dağlıq ərazilərdə olan kombaynlar arana səfərbər olunsun. Buna görə artıq elə bir problem yaşanmır. Bizə gündəlik zənglər olur, dərhal da problem öz həllini tapır".