Cümə günü ABŞ prezidenti Donald Tramp və Ukrayna prezidenti Vladimir Zelenski arasında kamera qarşısına keçən mübahisənin fəsadları davam edir.

Vaşinqton bu gün hərbi yardımı müvəqqəti dayandırdığını elan etdikdən sonra Avropa ölkələrinin Kiyevə dəstək vermək üçün daha böyük məsuliyyəti yaranıb.

“The New York Times” yazıb ki, 2022-ci ilin fevralında Ukrayna müharibəsi başlayandan sonra ələ keçirilən və dondurulan Rusiya aktivlərinin Kiyevə göndərilməsi üçün səylər artır.

ABŞ, Avropa Birliyi, Böyük Britaniya və bəzi digər ölkələrdə saxlanılan 300 milyard dollara yaxın pul Rusiya Mərkəzi Bankına məxsusdur.

Müharibə zamanı bu aktivlərdən güc əldə etməmək üçün Rusiyanın girişi kəsildi.

Son 3 ildə pulun Kiyev administrasiyasına verilməsi dəfələrlə müzakirə olunsa da, beynəlxalq hüququn pozulması və beynəlxalq iqtisadi nizama və Qərb mərkəzi banklarının etibarına xələl gətirəcəyi ilə bağlı narahatlıqlar səbəbindən indiyədək belə bir addım atılmayıb.

Bununla belə, Polşanın baş naziri Donald Tusk ötən ay “X” hesabında, “Bəsdir danışıq, iş görmək vaxtıdır. Gəlin, Ukraynaya yardımımızı Rusiyanın dondurulmuş aktivləri hesabına maliyyələşdirək”, – yazaraq müzakirələri yenidən qızışdırıb.

Estoniya, Litva və Latviya da bu çağırışı dəstəklədiklərini bildiriblər.

Keçmişdə Co Bayden administrasiyası, eləcə də Fransa, Belçika və Almaniya bu ideyaya müqavimət göstərmişdi.

Lakin digər ölkələrin təzyiqi ilə Avropa Birliyi ötən ilin yayında Ukraynaya 50 milyard dollar krediti təsdiqlədi və bu pulun Rusiyanın dondurulmuş aktivlərindən qazanc və faizlə geri qaytarılacağını gözlədi.

“Huver” İnstitutundan Filip Zelikov, “Bu məsələ indi müzakirələrin mərkəzindədir”, – deyib.

70 yaşlı keçmiş diplomat və akademik Rusiyanın dondurulmuş aktivlərinin kiçik bir hissəsinin ABŞ-da olduğunu xatırladaraq, AB, Kanada, Avstraliya, Böyük Britaniya, Yaponiya və Sinqapurda bu məbləği 250 milyard dollar hesablayıb.

Ukraynanın müharibədən sonrakı bərpası üçün pula, eləcə də yeni silahlara ehtiyacı var. Dünya Bankı ötən həftə məlumat vermişdi ki, ölkənin itkiləri 10 il ərzində 524 milyard dollarla kompensasiya edilə bilər.

Böyük Britaniyanın keçmiş baş naziri Rişi Sunak ötən həftə “The Economist” jurnalında dərc etdiyi məqalədə Ukraynanın ehtiyaclarını ödəmək üçün Rusiya aktivlərinə həbs qoyulmasını təklif edib.

Sunak belə bir hərəkətin eyni hücumun təkrarlanmaması üçün yaxşı bir nümunə olacağını müdafiə etmişdi.

Onun varisi Keir Starmer həftə sonu Zelenski ilə 2,8 milyard dollarlıq yardım müqaviləsi imzalayıb və onun dondurulmuş Rusiya aktivlərindən əldə edilən gəlir və faizlərlə geri qaytarılacağına razılaşıb.

Ukraynanın keçmiş iqtisadi inkişaf naziri Timofey Milovanov ABŞ-ın artıq pul vermək istəmədiyini vurğulayaraq, “Günün sonunda Rusiyanın aktivlərindən hansısa formada istifadə olunacaq”, – deyib.