Azərbaycandan olan bir qrup vətəndaş Donald Trampın təşəbbüsü ilə həyata keçirilən qanunsuz miqrantlardan “təmizləmə” kampaniyası çərçivəsində ABŞ-dan Kosta-Rikaya deportasiya edilib.

Fevral ayında 200 nəfərdən ibarət bir qrup Kosta-Rikaya təyyarə ilə gətirilib. Bu qrupun tərkibində Azərbaycan, Ermənistan, Türkiyə, Çin, Rusiya, Gürcüstan, Qazaxıstan, Hindistan, Özbəkistan, Konqo, Vyetnam və Nepal vətəndaşları olub.

Qrupda olan 16 Çin vətəndaşı Kosta-Rika hakimiyyətinə siyasi sığınacaq üçün müraciət edib. Bu ölkənin Miqrasiya və Əcnəbilərlə İş üzrə Baş İdarəsi hazırda həmin müraciətləri araşdırır. Sığınacaq üçün müraciət edən şəxslər müvəqqəti miqrant yerləşdirmə mərkəzini tərk etmək və Kosta-Rika ərazisində işləmək hüququna malikdir.

Deportasiya olunanlar arasında 84 nəfər artıq öz ölkələrinə qayıdıb, 94 nəfər isə sığınacaqda qalmaqda davam edir.

Kosta-Rika hökuməti bildirib ki, ABŞ Dövlət Departamenti bu insanlara humanitar yardım və qulluq göstərilməsi üçün Beynəlxalq Miqrasiya Təşkilatına (IOM) maliyyə dəstəyi verir. Lakin Kosta-Rikanın cənubundakı, Panama ilə sərhədə yaxın yerləşən Korredores şəhərindəki CATEM sığınacağında miqrantların saxlanma şəraiti insan haqları təşkilatları, o cümlədən “Human Rights Watch” və bəzi qanunvericilər tərəfindən tənqid olunub.

Kosta-Rika hakimiyyəti isə israr edir ki, deportasiya olunanların insan hüquqları pozulmur və onlara tibbi yardım, qida, yaşayış və tərcüməçi xidmətləri təqdim olunur.

Xüsusilə narahatlıq doğuran hallar arasında, deportasiya olunan şəxslər arasında həyatları geri qayıtdıqları təqdirdə təhlükə altında olanların olmasıdır.

Qeyd etmək lazımdır ki, Tramp hakimiyyətə gəldikdən sonra ABŞ Miqrasiya Xidməti (ICE) 113 min miqrantı həbs edib, onların təxminən 100 mini artıq deportasiya olunub. ABŞ Miqrasiya Polisinin yanvar ayında dərc etdiyi siyahıya əsasən, 709 Azərbaycan vətəndaşı deportasiya olunmalı şəxslər sırasındadır. Lakin təxmin edilir ki, ABŞ-da qanunsuz yaşayan azərbaycanlıların real sayı bu rəqəmdən xeyli çoxdur. Son illərdə Latın Amerikası və Meksika üzərindən ABŞ sərhədini qanunsuz keçənlər arasında Azərbaycan vətəndaşları da görünməyə başlayıb. Onların bir qismi Tramp hakimiyyətə gəlməzdən əvvəl sığınacaq ala bilsə də, digərləri indi deportasiya riski ilə üzləşiblər. Həmçinin, daha əvvəl verilmiş sığınacaq belə, artıq deportasiyadan tam müdafiə təmin etmir.