ABŞ-ın Ankaradakı səfiri və Suriya üzrə xüsusi nümayəndəsi Tom Barak Suriya prezidenti Əhməd Şaranın “inklüziv hökumət qurmaq və Qərblə yaxınlaşmaq səyləri”nin onu radikal qrupların hədəfinə çevirə biləcəyini irəli sürüb.

“Al-Monitor”a danışan Barak, “Şara ətrafında bir müdafiə sistemi yaratmalıyıq”, – dedi.

Barak iddia edib ki, Bəşər Əsəd rejiminin devrilməsi prosesində Şara ilə birlikdə döyüşən və hazırda milli orduya inteqrasiya olunan əcnəbi döyüşçülər İŞİD terror təşkilatı kimi qruplar tərəfindən yenidən radikallaşdırılır.

Şaranı “ağıllı, özünə inamlı və diqqətli” bir lider kimi xarakterizə edən Barak, Suriya liderinin keçmiş əlaqələrini tənqid etməyi rədd etdiyini söylədi.

“Bu gün bizim maraqlarımız onun maraqları ilə üst-üstə düşür”, – səfir deyib.

***

Barak xatırladıb ki, Şaraa müxtəlif etnik və dini icmaların, xüsusilə xristianlar, ələvilər, kürdlər və druzların hüquqlarını təmin edəcəyinə söz verib.

Suriyaya qarşı sanksiyaların ləğvi üçün heç bir şərt olmadığını, ancaq gözləntilərin olduğunu bildirən Barak, “Bunlara Fələstinli yaraqlılara qarşı daha sərt mövqe sərgiləmək, terror təşkilatı İŞİD-lə mübarizə aparmaq və Suriyanın İbrahim razılaşmalarına qoşulma istiqamətində addımlar atmaq daxildir”, – deyib.

Barak İsrail ilə Suriya administrasiyası arasındakı gərginliyə də toxunub. Səfir, “İki ölkə arasında münasibətlərin bir gün normallaşa biləcəyinə dair siqnallar var. Əsədin devrilməsindən sonra İsrail Suriyanın cənubunda hərbi fəaliyyətlərini artırıb və Colan təpələrindəki 400 kvadrat kilometrlik bufer zonasına nəzarəti ələ keçirib”, – deyib.

İsrail və Şarja rəhbərliyinin birbaşa dialoqda olmamasına baxmayaraq, “sakit anlayış”la hərəkət etdiklərini ifadə edən Barak, “Hər iki tərəfin bu mərhələdə hərbi qarşıdurmaya girməsinin çox pis nəticələri olacağının fərqindəyik”, – deyib.