1989-cu ilin aprelində Gürcüstan paytaxtı Tiflisdə kütləvi etiraz aksiyaları baş verərkən Eduard Şevardnadzenin mühafizəçilərindən biri azərbaycanlı olub. Modern.az-ın əldə etdiyi bu ilginc faktın qəhrəmanı Qazax rayonu Çaylı kəndində yaşayan Rafael Adıgözəlovdur.

Həmin hadisə zamanı Eduard Şevardnadze SSRİ xarici işlər naziri postunu tuturdu. Yaddaşlardan heç vaxt silinməyəcək etiraz aksiyaları sovet qoşunları tərəfindən amansızlıqla yatırıldı. 19 nəfərin həlak olduğu hadisədən dərhal sonra uzun illər bu ölkəyə rəhbərlik etmiş keçmiş I katib, həmin dövrdə SSRİ xarici işlər naziri olan Edurad Şevardnadze Tiflisə gəlir.

Gürcü siyasətçi-diplomatın təhlükəsizliyini təmin edən şəxslərdən biri soydaşımız Rafael Adıgözəlov o dövrü belə xatırlayır:

«Sovet qoşunlarının Hərbi Desant Qüvvələrinin Gəncə şəhərində yerləşən 23-cü diviziyasında xidmət edirdim. Tiflisdə baş verən hadisədən sonra məni bir qrup desantçı ilə birlikdə Edurad Şevardnadzenin mühafizəsini təmin etmək üçün Gürcüstan paytaxtına ezam etdilər. Düz 1 ay – 1989-cu ilin aprelindən mayına qədər onu mühafizə etdik».

Rafael Adıgözəlov deyir ki, o zaman Şevardnadze gürcülər tərəfindən çox yaxşı qarşılanıb.

«Xarici işlər naziri olmasına baxmayaraq, öz doğma bacısı ilə görüşmək üçün ona 1 dəqiqə vaxt verdilər. Bunların hamısı gözümüzün qarşımızda baş verirdi. Şevardnadze çox gözəl və vətənini sevən insan idi. Xalqı ilə görüşlər keçirdi.

Mühafizəçi əsgərlər arasında yeganə qafqazlı mən idim. Qalanlar rus, belorus, yəhudi, tatar idi. Bir dəfə Şevardnadze mənə yaxınlaşaraq rusca haralı olduğumu soruşdu. Mənsə Gürcüstanla sərhəddən, Qazax rayonundan olduğumu dedim. Gülə-gülə «sən necə oldu bura düşdün?» deyə mənim buraya gəlməyimə təəccübləndi».

Keçmiş desantçı xatırlayır ki. Şevardnadze ətrafı ilə yalnız rusca danışırdı. «Yalnız rus dilində danışırdı. Gürcü dilində verilən suallara da yalnız rusca cavab verirdi. İnsanları sakitləşdirir və hər şeyin yaxşı olacağını deyirdi. Gürcüstandakı azərbaycanlılarla da görüşdü və hamıya qarşı çox gözəl münasibət sərgilədi.

Moskvadan göstəriş gəldikdən sonra o, Tiflisi tərk etməli oldu. SSRİ xarici işlər nazirini aeroporta qədər müşayiət etdik. Ümumiyyətlə, 1 ay müddətində o hara gedirdisə, zirehli maşınlarla onu müşayiət edirdik. Sonda hamımıza təşəkkürün bildirdi və hər şeyin yaxşı olacağı vədini verərək, trapla təyyarəyə qalxdı».

Qeyd edək ki, 56 yaşlı Rafael Adıgözəlov hazırda Qazaxın Çaylı kəndində yaşayır. Sovet qoşunlarındakı xidmətini başa vuraraq, Milli Ordu tərkibində Qarabağda vuruşan veteran hərbçi kimi təqaüdə çıxıb.