Rusiyanın Hesablama Palatasının sədri Aleksey Kudrin Dumada çıxış edərkən bu il inflyasiya 20,7 faiz, gələn il isə kifayət qədər böyük olacaq deyərək diqqəti büdcəyə cəlb edib. O Rusiya hökumətinin bu il büdcə qaydasından imtina edərək strateji qərar verdiyini xatırladıb: “Bu, o deməkdir ki, əvvəllər Milli Rifah Fonduna (NWF) daxil olan bütün neft və qaz gəlirləri xərclənəcək. Əgər baza proqnozundan çıxsaq, iqtisadiyyatı dəstəkləmək üçün 6,3 trilyon rubl (təxminən 84 milyard dollar) xərclənəcək”.

Məsələ burasındadır ki, Rusiya neft-qaz gəlirlərindən proqnozlaşdırdığı 84 milyard dolları qazanmaqda çətinliklərlə üzləşib. Belə ki, neft satışı mart ayında əvvəlki ilin eyni dövrü ilə müqayisədə 28 faiz azalıb, “Gazprom” da qaz hasilatını 4 faiz azalacağını proqnozlaşdırıb, kömür satışı da kəskin aşağı düşüb. Düzdür bütün bunlar dünya bazarında hər 3 enerji daşıyıcılarının, xüsusilə də kömürün qiymətini kəskin artırıb. Ona görə də Cənubi Afrikadan Avropaya üzən gəmilərin əksəriyyətində kömür daşınır.

Bundan əvvəl Dumada çıxış edən Rusiya Bankının sədri Elvira Nabiullina ölkənin daxili resurslarının 2-ci rübün sonu və ya 3-cü rübün əvvəlində tükənəcəyini elan etmişdi. 

Hazırda sanksiyalardan ən çox əziyyət texnoloji məhsul və idxaldan asılı olan istehsal sektorlardır, onların sırasında müdafiə, kosmos, avtomobil, kağız, toxuculuq da vardır. Bu sektorda çalışan müəssisələr işçilərini ödənişsiz məzuniyyətə göndərirlər. Belələrinin sayı milyonlarladır və artmaqda davam edir.