Avropa Mərkəzi Bankının (AMB) prezidenti Kristin Laqard, tariflərlə bağlı gərginliyin beynəlxalq ticarəti həmişəlik dəyişəcəyi barədə xəbərdarlıq edib. “G7” maliyyə nazirlərinin görüşü üçün Kanadada olan Laqard müsahibəsində “Beynəlxalq ticarətin bir daha heç vaxt əvvəlki kimi olmayacağı tamamilə aydın olsa da, danışıqların davam edəcəyi də aydındır” dedi.

AMB rəhbəri tariflərin inflyasiyaya təsirinin proqnozlaşdırılmasının çətin olduğunu deyib: “Avropa qisas alaraq idxal xərclərini artırarsa, inflyasiya təsirləri ola bilər, lakin ucuz Çin malları Avropa bazarlarını doldurarsa, qısa müddətdə deflyasiya təsirləri də ola bilər”.

“G7”nin maliyyə nazirləri və mərkəzi bank rəhbərləri cümə axşamı sona çatan iclasda qlobal iqtisadiyyatdakı həddindən artıq balanssızlıqları aradan qaldırmağa, bərabər şərait yaratmağa və şəffaflığı artırmağa söz veriblər.

Bəyanatda Çindən aşağı qiymətli daşımaların risklərinə diqqət çəkilib və Ukraynaya dəstək ifadələri yer alıb. Bəyanatda ABŞ-ın tarif siyasətləri ilə bağlı fikir ayrılıqlarına da əhəmiyyət verilməməsi diqqət çəkib. Əvəzində diqqət qlobal iqtisadiyyatda ifrat balanssızlıqları həll etmək üçün birgə çağırışa yönəldilib. Bu çağırışın Çinə yönəldiyi aydın olsa da, ölkənin adı çəkilməyib.

Kanadanın maliyyə naziri Fransua-Filip Şampan bildirib ki, bəyanatın yumşaldılması qərarının iştirakçılar arasında olan ABŞ-ın maliyyə naziri Skott Bessenti sakitləşdirmək üçün verilməyib. “Tariflər ətrafında həmişə gərginlik olacaq. Amma ortaq dil tapa biləcəyiniz sahələr var”, – deyən Şampan bazardan kənar praktikalarla bağlı dialoqa işarə edib.