Məncə, bundan sonra yalnız “McLaren” komandasının sürücülərinin mübarizəsi yarışlara rəng qatacaq – digər mübarizələrin isə heç bir dəyəri qalmadı...

Lando Norris şənbə günü (iyunun 28-i) qazandığı poulu asanlıqla qələbəyə çevirdi. Yalnız yarışın ilk hissəsində komanda yoldaşının sıx pressinqinə məruz qalan britaniyalı sürücü onunla müqayisədə daha əvvəl etdiyi pit-stoplar sayəsində mövqeyini sığortaladı. Fərq böyük olanda ənənəvi səhvlərə də yol verdi, amma əsas mövsümdə 3-cü qələbəni qazanmaq idi, Lando da bu işin öhdəsindən əla gəldi.

Oskar Piastri ilk pit-stopuna 3 dövrə gec getməklə işini çətinləşdirdi və finişdə ikinci yerlə barışmalı oldu. Amma onun bu ikinciliyi komandasına mövsümdə 4-cü qələbə dublu gətirdi. Yarışın ilk hissəsində komanda yoldaşı ilə sərt mübarizəsi yaddaqalan idi. Ümumiyyətlə, “McLaren” komandasının sürücülərinə belə mübarizəyə icazə verməsi təqdirəlayiqdir.

Şarl Lekler sıralanma turunda 2-ci nəticəni göstərsə də, əvvəldən aydın idi ki, yarışda maksimum podiumun son pilləsinə namizəd olacaq. Ona görə də Şarlın bu nəticəsi maksimumdur – mövsümdə 4-cü podium və komanda yoldaşı ilə müqayisədə daha sürətli olması ona təsəlli verə bilər...

Əlbəttə, Liam Lousonun karyerasında ən yüksək nəticəsini xüsusi qeyd etmək lazımdır. Eyni zamanda, Qabriel Bortoletonun karyerasında ilk xallar qazanmasını da – son dövrələrdə müəllimi Fernando Alonso ilə mübarizəsi də möhtəşəm idi, deyəsən, Nando özü qəsdən bəzi şeyləri yetirməsinə öyrətməyib.

Bizi isə sürət beşiyi Silverstounda 75 ildən sonra keçiriləcək növbəti yarış gözləyir – Lyuis bu dəfə podium qazana biləcəkmi?