İran parlamentində təhdid mexanizminin işə düşməsi halında ölkənin 1970-ci ildən bəri üzv olduğu Nüvə Silahlarının Yayılmamasına dair Anlaşmadan (NPT) çıxmasını nəzərdə tutan qanun layihəsi hazırlanır.

Bu barədə İran Məclisinin Milli Təhlükəsizlik və Xarici Siyasət Komissiyasının sözçüsü İbrahim Rzayi məlumat verib. Onun sözlərinə görə, BMT-nin sanksiyalarını geri qaytara biləcək bu mexanizmin işə düşməsi ehtimalı müzakirəyə çıxarılıb və komissiya üzvlərinin əksəriyyəti bu halda hökumətin NPT-dən çıxmasını nəzərdə tutan bir qanun layihəsinin hazırlanmasını təklif ediblər.

Qanun layihəsi üzərində işin başladığını bildirən Rzayi, onun əvvəlcə komissiyada müzakirəyə təqdim olunacağını deyib.

***

2015-ci ilin 14 iyul tarixində İran ilə BMT Təhlükəsizlik Şurasının 5 daimi üzvü və Almaniya arasında əldə olunan nüvə razılaşması çərçivəsində, İrana qarşı sanksiyaların ləğvi qarşılığında onun nüvə fəaliyyətləri məhdudlaşdırılmışdı.

Lakin ABŞ, 2018-ci ildə keçmiş prezident Donald Trampın qərarı ilə razılaşmadan birtərəfli qaydada çıxaraq İrana qarşı sanksiyaları bərpa etdi. Avropa ölkələri bu addıma qarşı çıxsa da, ABŞ-a əks tədbir görə bilməmişdi. Bunun ardınca İran 1 il sonra razılaşmadakı öhdəliklərini mərhələli şəkildə dayandıraraq yüksək səviyyəli uran zənginləşdirməyə başlamışdı.

Son olaraq İran, Almaniya, Fransa və Britaniya nümayəndələri iyulun 25-də İstanbulda görüş keçirib və danışıqları davam etdirmək barədə razılığa gəliblər.

*** 

İran rəsmiləri daha öncə dəfələrlə bəyan ediblər ki, BMT-nin sanksiyalarını geri qaytaracaq bir addım atılacağı təqdirdə, NPT-yə üzvlüklərini yenidən nəzərdən keçirəcəklər. Hazırda hazırlanan qanun layihəsi bu mövqenin qanuniləşdirilməsi istiqamətində atılan ilk rəsmi addım kimi qiymətləndirilir.