Almaniyanın Hessen əyalətində tibb işçiləri vəzifə yerinə yetirərkən fiziki hücumlara məruz qalmaqda davam edir. Səhiyyə Nazirliyinin məlumatına görə, 2023-cü ildə xəstəxana şəraitində ümumilikdə 189 işçi zorakılığa məruz qalıb. Onlardan 34-ü həkim, 155-i tibb bacısıdır.

Səhiyyə Nazirliyi “Klinika” və “Xəstəxana” kimi adlandırılan hadisələri əhatə edən statistikada fiziki toxunulmazlıq və azadlıq əleyhinə törədilmiş cinayətləri nəzərə alıb. 2022-ci ildə hücuma məruz qalan tibb işçilərinin sayı 206 olaraq qeydə alınıb. Bu rəqəmlər səhiyyə sektorunda zorakılığın artıq tək bir hadisə olmadığını, struktur probleminə çevrildiyini göstərir.

Bu halların xüsusilə böyük şəhərlərdəki xəstəxanalarda daha sıx görüldüyü ifadə edilir. Nazirlik bu vəziyyətin şəhərlərdə səhiyyə müəssisələrinin sıxlığı ilə bağlı olduğunu vurğulayıb.

***

Hökumət tibb işçilərinə qarşı zorakılığı ən sərt şəkildə pislədiyini söyləyib. Bildirilib ki, hər bir xəstəxana öz şərtlərinə uyğun olaraq görüləcək tədbirlərə qərar verməlidir. Bunlara polis, təhlükəsizlik xidmətləri, tikinti qaydaları ilə əməkdaşlıq daxildir. Bəzi xəstəxanalarda təhlükəsizlik qapıları, kamera sistemləri və işçilər üçün xüsusi təlimlərin zorakılığın azaldılmasında təsirli olduğu aşkar edilmişdi. Amma ümumi mənzərə ciddi olaraq qalır.

***

Zorakılığın əsas səbəbləri arasında təcili yardım otaqlarında gözləmə müddətləri, dil maneələri, maddə asılılığı, psixoloji pozğunluqlar və xəstə ziyarətçiləri ilə münaqişələr daxildir. Xüsusilə, təcili yardım xidmətlərində, psixiatriya şöbələrində və gecə növbələrində çalışan işçilər ən çox zərər çəkən qruplar sırasındadır.

***

Dövlət Tibb Palatası 2019-cu ildən rəqəmsal hesabat forması vasitəsilə zorakılıq hadisələrini qeydə alır. Qurumun sözçüsü xüsusilə “COVİD-19” pandemiyası zamanı aqressiya hallarının xeyli artdığını və ən çox məlumatların ailə təbabəti, psixiatriya və psixoterapiya sahələrindən gəldiyini bildirib.