Alman Silahlı Hava Qüvvələrinin məxsus “Airbus A319” tipli hökumət təyyarəsi Berlin–Köln marşrutu üzrə uçuş zamanı kokpitdən gələn xəbərdarlıq mesajı səbəbindən Leypziq hava limanına təcili eniş etməli olub. Bu barədə hava qüvvələri sözçüsü məlumat verib.

Hadisə zamanı təyyarədə yüksək rütbəli şəxslərin olduğu bildirilib. Bir qədər əvvəl Almaniyanın daxili işlər naziri Aleksandr Dobrindt, həmçinin Polşanın daxili işlər naziri Tomas Simonyak AB-nin Belarusla sərhədində vəziyyətlə tanış olduqdan sonra Berlinə dönüş etmişdilər.

Texniki mütəxəssislər təyyarəni bir gün ərzində araşdıracaq və onun təmirə ehtiyacı olub-olmadığını, yaxud uçuşa davam etməsinin mümkün olub-olmadığını müəyyənləşdirəcəklər.

Gecikmələr və təkrarlanan texniki nasazlıqlar

Hökumət təyyarələrində bu cür texniki problemlər əvvəllər də müşahidə edilib:

– 2023-cü ilin avqustunda sabiq xarici işlər naziri Annalena Birbok, “Airbus A340” təyyarəsində baş verən qanad nasazlığı səbəbindən Avstraliyaya səfərini ləğv etmək məcburiyyətində qalmışdı. Təyyarə havada iki dəfə 80 ton yanacaq boşaldaraq Əbu Dabiyə qayıtmalı olmuşdu.

– 2024-cü ilin mayında sabiq ədliyyə naziri Marko Buşmann, texniki nasazlıq səbəbindən Venesiyada 4 saatlıq ləngimə ilə üzləşmişdi.

– 2023-cü ilin noyabrında sabiq iqtisadiyyat naziri Robert Habek, “Airbus A350”də motorun alışma dövrəsindəki nasazlıq səbəbindən Portuqaliyada uçuşdan kənar qalmışdı.