ABŞ Prezidenti Donald Trampın yeni açıqladığı 50 faizlik tarif qərarları, qlobal maliyyə bazarlarında ciddi sarsıntılara səbəb olub.

Trampın göndərdiyi rəsmi məktubun ardından Braziliya aktivlərində kəskin satış dalğası yaşanıb. Braziliya realı ABŞ dollarına qarşı təxminən 3% ucuzlaşıb, iShares MSCI Brazil ETF-i isə təxminən 2% dəyər itirib.

Eyni zamanda, Trampın mis idxalına tətbiq ediləcək tarifləri təsdiqləməsi, metal bazarlarında da öz əksini tapıb. Londonda Metal Birjasında (LME) mis fyuçersləri 0,4% artaraq ton başına 9.664,50 dollara yüksəlib. Comex birjasında isə artım daha da kəskin olub – təxminən 3%.

Tariflərlə bağlı narahatlıqlar səbəbindən ABŞ indeks fyuçersləri bu səhər Bakı vaxtı ilə saat 07:49-da təxminən 0,2% geriləyib, Bloomberg Dollar İndeksi isə yüngül mənfi zonada ticarət olunur. Dünən Wall Street-də texnologiya səhmləri yüksəldiyi üçün bazar qismən bərpa olunmuşdu.

S&P 500 indeksi tarife dair narahatlıqlara baxmayaraq rekord səviyyəyə çox yaxın ticarət görüb. Nvidia səhmləri qısa müddətlik 4 trilyon dollar dəyərə çatıb. CNN-in "Qorxu və Tamah" İndeksi hazırda “aşırı tamah” səviyyəsini göstərir — bu, bazarın yüksəliş meyilinə işarədir.

Eyni zamanda, ABŞ-da keçirilən 39 milyard dollarlıq 10 illik istiqraz hərracına güclü tələb qeydə alınıb. Bu hadisə, artan büdcə kəsirinin maliyyələşdirilməsinə dair narahatlıqları qismən azaldıb. ABŞ istiqrazları beş günlük ardıcıl enişdən sonra dəyər qazanıb, 10 illik faizlər 6 baza bəndi azalaraq 4,34%-ə enib.

Bu səhər Asiya birjalarında isə mənzərə qarışıqdır:

• Yaponiyada 20 illik istiqraz hərracına tələb 12 aylıq orta göstəricidən (3,29) aşağı olub.

• Nikkei 225 indeksi 0,61% ucuzlaşıb,

• Çin CSI 300 0,30% yüksəlib,

• Honq Konq Hang Seng isə sabit seyr edib.

Bitcoin də risk iştahının artması fonunda çarşənbə günü toxunduğu rekord səviyyəyə yaxın ticarət olunur.