Avropa Mərkəzi Bankının (AMB) vitse-prezidenti Luis de Qindos Böyük Britaniyanın “The Sunday Times” qəzetinə müsahibəsində Donald Trampın administrasiyasını tənqid edib.

2011-2018-ci illərdə ölkəsinin iqtisadiyyat naziri vəzifəsini icra edən ispaniyalı bankir, ABŞ-ın yeni administrasiyasının yaratdığı qeyri-müəyyənliklərin “COVİD-19” pandemiyasından daha pis nəticələrə səbəb olduğunu iddia etdi.

Luis de Qindos bildirib ki, Trampın tariflər vasitəsilə maliyyə sistemindəki məhdudiyyətləri aradan qaldırmaq və korporativ vergilərdə islahatlar aparmaq planları bazarlarda qısamüddətli volatilliyə səbəb olur.

AMB rəsmisi bunların inflyasiya gözləntilərinə və faiz dərəcələrinə birbaşa təsir etdiyini iddia edib: “Biz hazırkı mühitdəki qeyri-müəyyənliyi nəzərə almalıyıq ki, bu da pandemiya dövründəkindən daha pisdir. ABŞ-ın yeni administrasiyasının çoxtərəfliliyə davam etməyə o qədər də açıq olmadığını görürük. Bu prinsip müxtəlif səlahiyyətli orqanların birgə işləməsi və ümumi problemlərin həlli yollarının tapılması ilə bağlıdır. Bu, böyük dəyişiklik və böyük qeyri-müəyyənlik mənbəyidir”.

Bütün bunlara baxmayaraq, Luis de Qindos inflyasiyanın AMB tərəfindən qoyulan 2 faizlik hədəfə çatmaq yolunda olduğunu iddia edib.

Kristin Laqardın rəhbərlik etdiyi AMB beynəlxalq münasibətlərdəki qeyri-müəyyənlik fonunda Avrozonada inflyasiyanı sabitləşdirməyə çalışır. İlin ilk idarə heyətinin iclası ayın əvvəlində keçirilərkən, iyun ayından bu yana 6-cı faiz endirilməsi qərarı verildi.

Bank depozit faizlərini 2,75 faizdən 2,50 faizə endirib.

AMB həmçinin yenidən maliyyələşdirmə dərəcəsini və marjinal borclanma dərəcəsini 25 bənd aşağı salaraq, müvafiq olaraq 2,65 və 2,90 faizə endirib.

AMB-nin qərarları, fevral ayında inflyasiyanın 2,4 faizə çatması ilə avrozonada artımın durğunluğundan sonra gəlib.

Bir neçə gün əvvəl BBC-yə danışan Laqard Trampın aqressiv tarif siyasəti səbəbindən qlobal ticarət müharibəsi başlayarsa, qlobal artım və qiymət sabitliyinə mənfi təsir göstərə biləcəyi barədə xəbərdarlıq edib.

Laqard həmçinin vurğulayıb ki, Brüsselin tarif mübahisəsində ABŞ-dan qisas almaqdan başqa çarəsi yoxdur.

69 yaşlı fransız Trampın “Avropa Birliyi ABŞ-ı məhv etmək üçün yaradılıb” iddiasına da cavab verib: “Bu, təkcə pis ifadə deyil, həm də tarixdən sui-istifadədir”.