Böyük Britaniyanın baş naziri Keir Starmer paytaxt Londonun şimal-qərbindəki Nortvud hərbi bazasında 30-a yaxın ölkənin yüksək səviyyəli hərbi rəsmiləri ilə görüşüb. İclasda sülh sazişi çərçivəsində Ukraynaya göndərilən əsgərlərin Ukraynanın təhlükəsizliyinin təmin olunmasına necə töhfə verə biləcəyi müzakirə olunub.

Mümkün sülh razılaşmasından sonra sülhü qorumaq üçün Ukraynaya sülhməramlılar göndərməyə hazır olan “istəklilər koalisiyası” adlanan ölkələrin hərbi rəsmilərinin iştirak etdiyi görüşdə Britaniyanın müdafiə naziri Con Hili də iştirak edib.

İngiltərə Baş naziri Starmer görüşdən sonra verdiyi açıqlamada Rusiya ilə Ukrayna arasında müharibənin dayandırılmasına dair razılaşmanın daimi olması üçün təhlükəsizlik tədbirlərinin görülməsi lazım olduğunu bildirib. İngiltərə və müttəfiqlərinin siyasi danışıqlar mərhələsindən hərbi planlaşdırma mərhələsinə keçdiyini vurğulayan Starmer, “planlaşdırma sülh razılaşması əldə edilməzdən əvvəl dərhal edilməlidir”, – deyib.

***

“Təhlükəsizlik tənzimləmələrinin məqsədi Rusiyaya, əldə edilmiş razılaşmanı pozarsa, ciddi nəticələrin olacağını başa salmaqdır. Bunun üçün ABŞ-ın bunun bir hissəsi olması lazımdır. Çünki Putin açıq şəkildə başa düşməlidir ki, sərhədləri aşsa, ciddi nəticələr olacaq. Bu planın məqsədi, Estoniya və bizim sülhü qoruduğumuz digər ölkələrdə olduğu kimi”, –  Starmer deyib.

“Bizim bu işi görməyimiz son dərəcə vacibdir, çünki bir şeyi dəqiq bilirik. Bunun arxasında təminatları olmayan istənilən razılaşma Putin tərəfindən pozulacaq. Biz bunu bilirik, çünki bu, əvvəllər də olub. Bunun bir daha təkrarlanacağına şübhəm yoxdur”.

***

Bugünkü görüşdən əvvəl Starmer ölkənin şimal-qərbində nüvə sualtı qayıqlarının inşa olunduğu Barrou limanına baş çəkib. Baş nazir nüvə silahı olan sualtı qayığa baş çəkməklə və on ildən artıq müddətdə Vanguard sinifli sualtı qayığa minən ilk Britaniya lideri olub. Britaniya mediası Starmerin ciddi mühafizə olunan nüvə sualtı qayığına səfərini əks etdirən kadrların Moskvaya mesaj olduğunu yazıb. Səfər zamanı danışan Starmer, bugünkü danışıqlarda Ukraynanın səmalarını, dənizlərini və sərhədlərini necə təhlükəsiz saxlamaqla bağlı müzakirələrin aparılacağını bildirib. İngiltərə bu ayın əvvəlində 26 ölkənin iştirak etdiyi oxşar sammit təşkil etmişdi.