Azərbaycan Gənclərinin Avropaya İnteqrasiyası Təşkilatı, bildiyiniz kimi, 4 ildən artıqdır, Biznes etikası mövzusunun təbliğatı ilə məşğuldur. İlk təlimlər layihələr çərçivəsində həyata keçirilmişdir. Lakin gənclərin yüksək maraqlarını gördükdən sonra, bu mövzunu daha da genişləndirərək, internet tv-lərdə veriliş formatında təlim hazırlamağa başlanılmışdır.

Müxtəlif mövzularda hazırlanan təlim-verilişlərdə, nəinki, etik qaydalar, həm də fərdi inkişafa dair biliklər verilir. CV necə yazılmalıdır, işə qəbul zamanı müsahibədən uğurlu nəticə almaq üçün nə etmək lazımdır, həmçinin, diplomatik protokol qaydaları, geyim və dress-kod, uğurlu düşüncənin formalaşması və digər xüsusi mövzular daha geniş auditoriyaya açıqlandı və bu gün yüksək reytinqlə izlənməkdə davam edir. Bu göstərici çox sevindiricidir. Çünki bu təlimləri izləyən auditoriya inkişafa doğru seçim edənlərin yoludur. Bu yolda kəmiyyət etibarilə say artdıqca, keyfiyyət göstəricisinin yüksəlişini də izləmək olur. Bildiyiniz kimi, «Eurovision-2012» Azərbaycan, «İGF- 2012» Bakı kimi beynəlxalq tədbirlərdə Beynəlxalq etiket üzrə rəsmi təlimçi olmuşdum. Ümumi birləşdirsək, 2000-dən artıq könüllü xidmət və işçi heyətinə təlim demişdim. Müşahidələrim və nəticələrim onu göstərdi ki, daxilimizdə olan mədəniyyəti, olduğu kimi təqdim edə bilmək istəyimiz və bacarığımı var. Milli kimliklə bərabər, beynəlxalq etiketi təqdim edə bilmək qabiliyyəti də əvəzedilməz müsbət təəssürat yaradır və yaddaşlarda qalır.

Özünü doğru ifadə edə bilmək qabiliyyətinə malik olmaq üçün hazırda təlimlərimiz davam edir. Onu da mütləq qeyd etməliyəm ki, Böyük Britaniyanın Kommersiya Meneсmenti İnstitutunda effektiv danışıqlar proqramı üzrə təlimlərə başlayırıq. «İlk 5 dəqiqə», «Uğurlu danışıqların sirri», «Xarizmatik natiq «, «Formula: Motivasiya = mən + fizika», «Liderlik - təsir mexanizminin inkişafı» təlimlərini aparacam.

Təlimin sonunda 3 saat davam edən yazılı imtahanın uğurlu nəticəsi kimi «Diploma in Business Communications» ixtisas sənədi veriləcək. Bu imkanları, artıq, ölkəmizdən kənara çıxmadan belə əldə etmək mümkün olacaq.

Günel İbrahim - Biznes Etikası üzrə ekspert, gəlir və gəlir mənbələrinin artırılması üzrə ilk beynəlxalq təlimçi, Qırmızı Xaç ve Qızıl Aypara Cəmiyyətinin MDB ölkələrində fandreyzinq , biznes etiket və müqavilələrin bağlanması üzrə, internet tv verilişlərinin ilk əsasını qoyan, «Evrovision 2012» İnternet Govermance forum və bir sıra əhəmiyyətli beynəlxalq tədbirlərin beynəlxalq etiket üzrə təlimçisi, Almaniya, Türkiyə, Rusiyada biznes psixologiyası üzrə təlim alan milli kadr.