Avropada Rusiyaya lobbiçilik edənlər artıq əl-ayağa düşüblər, hətta “üç meymunu” oynamağa başlayıblar. Almaniya Ukraynaya vəd etdiyi silahları göndərməkdən müxtəlif bəhanələrlə yayınır. Hətta Almaniya hökuməti bildirir ki, Ukraynanın onların göndərdiyi tanklardan Rusiya ərazisinə hücum məqsədilə istifadə edə biləcəyindən ehtiyatlanırlar.

İtaliya isə taxıl əvəzində Ukrayna ərazilərinin güzəşti hesabına Rusiya ilə sülh anlaşması təklif edir. Üstəlik, dünya bazarına çıxarılması nəzərdə tutulan taxıl da elə Ukraynaya məxsusdur. Görünür, Kreml İtaliyanın siyasi elitasında təmsil olunanlara ən yüksək dozada “Sputnik V” vura bilib.

Maraqlıdır ki, İtaliya hətta Rusiya ilə eyni dildə danışaraq, ABŞ və Böyük Britaniyanı beynəlxalq ərzaq böhranı təhlükəsiylə də təhdid edir. Rəsmi Romanın əsas arqumenti odur ki, əgər, Ukrayna taxılı dünya bazarına çıxarılmazsa, ərzaq böhranı yarana bilər. Nəticədə üçüncü dünya dövlətlərində, konkret olaraq, Afrika ölkələrində aclıq baş qaldırar və hərbi çevrilişlər, müharibələr başlayar.

İtaliyanın bu iddiaları riyakarlıqdan başqa bir şey deyil. Afrika ölkələri nə vaxt tox olublar? Avropalılar bu kontingentin təbii sərvətlərini daşıyıb, zəngin yaşadıqları üçün afrikalılar həmişə aclıq və səfalət içərisində yaşayıblar. Üstəlik, Ukrayna taxılının alıcısı da Afrika ölkələri deyil. Yəni, Ukrayna taxılı dünya bazarlarına çıxarılsa da, çıxarılmasa da Afrika qitəsində nə müsbətə, nə də mənfiyə heç nə dəyişməyəcək.

İtaliyanın birdən-birə Afrika dövlətlərinin “qayğısına qalması” Rusiyanı düşdüyü durumdan çıxarmaq üçün bütün dünyanın şantaj edilmə cəhdidir. Əgər, İtaliya afrikalıların vəziyyətini düşünən dövlət olsaydı, onilliklər boyu Yunanıstan ilə birlikdə bu iki ölkəyə qayıqlarla pənah aparan afrikalı miqrantları dənizdə batırmazdı...