Yaponiya ilə ABŞ arasında tarif gərginliyi fonunda yüksək səviyyəli danışıqlar yenidən başlayıb. Yüksək tariflərin tətbiq olunması üçün müəyyən edilən 1 avqust son tarixi yaxınlaşdıqca, tərəflər arasında təmaslar intensivləşir.

Vaxt.az xəbər verir ki, Yaponiya iqtisadi canlanma naziri Ryosey Akazava ilə ABŞ ticarət naziri Hovard Lutnik dünən Vaşinqtonda iki saatdan artıq davam edən görüş keçiriblər. Yaponiyanın Nazirlər Kabinetindən verilən açıqlamaya görə, tərəflər “qarşılıqlı faydaya əsaslanan razılaşma”ya nail olmaq üçün səmimi və dərin müzakirələr aparıblar. Tokio bu müzakirələrdə milli maraqlarını qorumağı əsas prioritet elan edib.

Apreldən bəri davam edən danışıqlar hələ ki nəticə verməyib. Baş nazir Şigeru İşibanın bazar günü keçirdiyi seçkidə uğursuzluğa düçar olması fonunda, Yaponiya hökuməti 1 avqusta qədər tariflərin ertələnməsi üçün ABŞ-dan yeni güzəştlər almağa çalışır.

Əgər razılaşma əldə olunmasa, ABŞ 1 avqustdan etibarən Yaponiyadan idxal olunan mallara tətbiq olunan tarifləri 1 faizdən 25-ə qaldıracaq. Əvvəlki planlarda bu artım 24 faiz olaraq nəzərdə tutulurdu.

***

ABŞ-ın maliyyə naziri Skott Bessent, Yaponiya seçkilərinin danışıqlara təsiri ilə bağlı konkret fikir bildirməyib. O, medianın suallarını cavablandırarkən bildirib ki, ABŞ hökumətinin prioriteti Yaponiya daxili siyasəti deyil, Amerika xalqı üçün ən sərfəli razılaşma əldə etməkdir.

Bessent ötən həftə Osakada keçirilən Dünya Sərgisinə rəhbərlik etdiyi səfər zamanı da optimist mövqe sərgiləmişdi. Onun sözlərinə görə, tərəflərin qarşılıqlı maraqlarını nəzərə alan bir razılaşma hələ də mümkündür.

Lakin Bessent qeyd edib ki, “tələsik bağlanmış razılaşmadan daha önəmli olan – yaxşı hazırlanmış razılaşmadır”.