“Apple” gələn ildən etibarən “Formula 1”in ABŞ-dakı yarışlarının yayım hüquqlarını 5 illik müddətə əldə edib.

Vaxt.AZ xarici KİV-ə istinadən xəbər verir ki, “Apple TV” abunəçilərinə məşq sessiyaları, sıralama turları, “Sprint” yarışları və bütün Qran Pri yarışlarını canlı olaraq təqdim edəcək.

Seçmə yarışlar və bütün məşq sessiyaları isə mövsüm boyu pulsuz izlənilə biləcək.

Bundan əlavə, “F1 TV Premium” ABŞ-da “Apple TV” abunəliyi ilə əldə edilə biləcək və yalnız “Apple TV” abunəçiləri üçün pulsuz olacaq.

“Formula 1”in baş icraçı direktoru Stefano Domenikali bildirib ki, bu, “Apple” və bütün “Formula 1” üçün inanılmaz dərəcədə həyəcanverici bir tərəfdaşlıqdır: “Düzgün məzmun və innovativ yayım kanalları ilə ABŞ-dakı böyümə potensialımızı maksimum dərəcədə artırmağa davam edə biləcəyik”.

“Apple”ın Xidmətlər üzrə baş vitse-prezidenti Eddi Kyu isə razılaşmaya dair açıqlamasında, ““Formula 1” ilə əməkdaşlığımızı genişləndirməkdən və “Apple TV” abunəçilərinə dünyanın ən həyəcanverici və sürətlə inkişaf edən idman növlərindən birinə birinci sıradan çıxış imkanı təqdim etməkdən böyük məmnunluq duyuruq”, – deyib.