İsrail kəşfiyyat mənbələri, ABŞ-ın hava zərbələrindən əvvəl İranın nüvə obyektlərindəki zənginləşdirilmiş uranı başqa yerə daşıdığına dair hər hansı sübut tapmadıqlarını bildiriblər.

“Reuters” agentliyinə açıqlama verən və adının açıqlanmasını istəməyən israilli kəşfiyyat rəsmisi, İranın Fordo, İsfahan və Natanzdakı üç əsas nüvə obyektindəki uranın eyni yerdə saxlandığını iddia edib.

Mənbəyə görə, bu obyektlərdə təxminən 400 kiloqram, 60 faizə qədər zənginləşdirilmiş uran qalır və iranlıların bu materiala çıxışı hələ də mümkündür. Həmçinin, həmin uranı başqa yerə təhlükəsiz şəkildə köçürməyin İran üçün texniki baxımdan çətin olduğu vurğulanır.

ABŞ zərbələrinin miqyası və nəticələri müzakirə mövzusudur

Xatırladaq ki, iyunun 22-də ABŞ, İranın üç nüvə obyektinə qarşı hava hücumu həyata keçirmişdi. Əməliyyatda 14 ədəd sığınacaq dağıdan “GBU-57” bombalarından istifadə edilib, “B-2” bombardmançı təyyarələri ilə icra olunan hücum zamanı obyektlərin “tamamilə məhv edildiyi” ABŞ Prezidenti Donald Tramp tərəfindən iddia edilmişdi.

Lakin CNN və “The New York Times” kimi media qurumları istinad etdikləri kəşfiyyat mənbələrinə əsaslanaraq, zərbələrin gözlənilən təsiri vermədiyini yazmışdı. Tramp administrasiyası bu xəbərləri “dezinformasiya” adlandıraraq Federal Təhqiqat Bürosunun (FTB) məsələ ilə bağlı araşdırma başlatdığını açıqlamışdı.

Sonradan, Mərkəzi Kəşfiyyat İdarəsinin (MKİ) direktoru Con Ratkliff, iyunun 25-də verdiyi açıqlamada, İran obyektlərinin “ciddi şəkildə zərər gördüyünü” təsdiqləyən məlumatlara malik olduqlarını bildirmişdi. Bundan əvvəl bəzi xəbər mənbələri İranın uranı zərbələrdən öncə başqa yerə köçürdüyünü iddia etsə də, bu versiya israilli kəşfiyyatçılar tərəfindən dəstəklənmir.

Qəzzada atəşkəs ümidləri, daxili təzyiqlər

Digər tərəfdən, İsrail kəşfiyyatına görə, İranla 12 günlük qarşıdurmadan sonra İsrail və “HƏMAS” arasında Qəzzada bir-iki həftə içində atəşkəs əldə olunması ehtimalı var.

ABŞ-ın vasitəçiliyi ilə hazırlanan 60 günlük ilkin atəşkəs planı ətrafında tərəflərin razılaşacağı təqdirdə, İsrail tərəfinin “HƏMAS”a qalıcı atəşkəs təklif edəcəyi, bunun əvəzində təşkilatın silahı yerə qoymasının istəniləcəyi bildirilir. “HƏMAS”ın bu təklifi qəbul etməməsi halında isə hərbi əməliyyatların davam edəcəyi ehtimal olunur.

Lakin İsraildəki radikal sağçı dairələr bu planlara qarşı çıxırlar. İsrailin ictimai yayım qurumu “KAN”ın məlumatına görə, Maliyyə naziri Bezalel Smotriç özəl görüşlərdə İsrail ordusunun atəşkəslə birlikdə Qəzzadan çəkilməsinin “ağlabatan olmadığını” bildirib.

Daxili Təhlükəsizlik naziri İtamar Ben-Qvir isə “X” sosial şəbəkəsində etdiyi paylaşımda Baş nazir Benyamin Netanyahuya səslənərək: “Razılaşma üçün çalışmağı dayandırın”, – deyə yazıb.