ABŞ, Hindistanın nəzarətindəki Cammu və Kəşmirdə törədilən son terror aktının ardınca Pakistan mərkəzli “Ləşkər-e-Tayyibə” (LeT) təşkilatının qolu hesab edilən “Müqavimət Cəbhəsi”ni (TRF) xarici terror təşkilatı elan edib.

ABŞ Dövlət katibi Marko Rubio dünən verdiyi açıqlamada bu qərarın, Prezident Donald Trampın “Pahalqam hücumuna görə ədalət çağırışının bir hissəsi” olduğunu bildirib.

Rubio, 2019-cu ildə qurulan TRF-ni LeT-nin “əlaltısı” adlandıraraq onun regionda qeyri-sabitliyi dərinləşdirdiyini vurğulayıb.

Hindistan məmnun, Pakistan etiraz edir

Hindistanın xarici işlər naziri Subrahmanyam Ceyşankar qərarı alqışlayaraq bu addımın “ABŞ ilə Hindistan arasında terrora qarşı mübarizədə əməkdaşlığın göstəricisi” olduğunu deyib.

Pakistan isə ölkədə LeT-yə aid bütün strukturların “çökdürüldüyünü” bəyan edib və TRF ilə LeT arasında hər hansı əlaqənin olmadığını bildirib. İslamabad rəhbərliyi əlavə edib ki, “bütün növ terror aktlarını qınayırlar”.

TRF Pahalqamdakı hücuma görə məsuliyyəti əvvəlcə üzərinə götürdü

22 aprel tarixində Hindistanın nəzarətində olan Kəşmirin Pahalqam bölgəsində törədilən hücum nəticəsində 26 turist həlak olmuşdu. Hadisədən dərhal sonra məsuliyyəti üzərinə götürən TRF, bölgədə “demoqrafik dəyişikliklərə qarşı çıxdığını” açıqlamışdı. Lakin daha sonra təşkilat bu bəyanatını geri çəkmişdi.

Hindistan isə baş verən hücumun arxasında Pakistanın durduğunu və TRF-nin LeT ilə “birbaşa əlaqəli” olduğunu iddia etmişdi.

ABŞ-ın addımı nə anlama gəlir?

Amerikanın nüfuzlu “Foreign Policy” dərgisinin yazarı Maykl Kuqelmanın fikrincə, TRF-nin terror təşkilatı kimi tanınması Vaşinqtonun Yeni Dehliyə siyasi dəstəyi kimi qiymətləndirilə bilər. Onun sözlərinə görə, bu addım ABŞ-Hindistan münasibətlərinin güclənməsinə zəmin yarada bilər.

Qeyd edək ki, Hindistan-Pakistan münasibətləri bu ay yenidən gərginləşib. 6 may tarixində Hindistanın Pakistan ərazisindəki Azad Kəşmir bölgəsinə raket zərbəsi endirməsi bölgədə toqquşmaların alovlanmasına səbəb olub. Ancaq 10 mayda ABŞ prezidenti Donald Tramp hərbi toqquşmaların dayandığını və bunun ABŞ vasitəçiliyi ilə əldə edilən atəşkəs nəticəsində mümkün olduğunu bəyan edib.