Dünyanın ən böyük akkumulyatorla işləyən gəmisi suya salınıb. Avstraliya gəmiqayırma şirkəti “Incat” tərəfindən dizayn edilən “Hull 096” Cənubi Amerikanın “Buquebus” bərə operatoru üçün Argentina-Uruqvay marşrutu üzrə hərəkət edəcək.

Bu gün suya buraxılan gəmi 2100 sərnişin və 255 avtomobil daşıma qabiliyyətinə malikdir və tamamilə akkumulyator və elektrik enerjisi ilə işləyir.

“İncat”ın baş icraçı direktoru Robert Klifford dedi: “Biz 40 ildən artıqdır ki, Tasmaniyada dünya üzrə aparıcı gəmilər tikirik. “Hull 096” bizim indiyə qədər işlədiyimiz ən iddialı, mürəkkəb və vacib layihədir”.

Şirkətin paylaşdığı məlumata görə, 130 metr uzunluğundakı “Hull 096” təkcə dünyanın ən böyük elektrik gəmisi deyil, həm də indiyə qədər inşa edilmiş ən böyük elektrik avtomobilidir.

Şirkətin baş direktoru Stiven Keysi, 250 tondan çox batareyaya malik gəminin böyük miqyaslı, aşağı emissiyalı nəqliyyat həllərində bir irəliləyiş olduğunu söylədi.

Birləşmiş Millətlər Təşkilatının Ticarət və İnkişaf Konfransına görə, qlobal gəmiçilik sektoru dünyanın illik emissiyalarının təxminən 3 faizini təşkil edir.

Melburndakı RMIT Universitetindən Liam Deyvis, yeni gəminin müntəzəm bərə marşrutu ilə işləyə bilməsinin vacib olduğunu söylədi.

Akademik “Hull 096”nın elektriklə işləyən gəmilərdə yarana biləcək problemlərin monitorinqi üçün yaxşı nümunə olacağını, akkumulyator sistemlərinin gələcəkdə konteyner gəmilərində də istifadə oluna biləcəyini bildirib.