Almaniyada bir çox istehlakçı ABŞ hökuməti ilə tarif mübahisəsinin nəticələrini bilmək istəyir. Bazar tədqiqatçıları həqiqətən bir şeyin dəyişib-dəyişmədiyini araşdırdılar.

Almaniyada bir çox insan ABŞ brendlərini boykot edəcəklərini açıqlayıb. Ancaq yalnız bir neçəsi həqiqətən bunu edir. Bazar araşdırmaçısı NIQ-a görə, bu günə qədər alış davranışına nəzərəçarpacaq təsir olmayıb. Məlumata görə, şokoladdan viskiyə qədər 25 qida seqmentinin təhlili, Almaniya markaları ilə müqayisədə ABŞ brendlərində ciddi azalma olmadığını göstərib.

NIQ-nin istehlakçı eksperti Deyvid Qeorqi hesab edir ki, bunun əsas səbəbi indiyədək məşhur məhsullardan imtina etmək üçün maddi yox, yalnız mənəvi təzyiqlərin olmasıdır. Elan edilmiş tariflər hələ də tətbiq edilməyib və ABŞ məhsulları bahalaşmayıb. Qiymətlər əhəmiyyətli dərəcədə artarsa, bu dəyişə bilər. “Qiymət məsələsi alman alıcıları üçün çox vacibdir”, – Georgi deyir.

***

Mart ayında “YouGov”un sorğusu, bir çox istehlakçının ticarət mübahisəsi səbəbindən ABŞ mallarını boykot edəcəklərini söylədi. İstehlakçıların 53 faizi “mütləq” və ya “ehtimal ki” artıq bu cür məhsulları almayacaqlarını bildirib.

Bununla belə, ekspertlər digər amilləri də qeyd edirlər. “Coca-Cola” kimi ABŞ-ın bir çox tanınmış məhsulları Avropada istehsal olunduğu üçün tariflərdən təsirlənmir. Bundan əlavə, bir çox istehlakçı hansı markaların ABŞ şirkətlərinə aid olduğunu belə bilmir. Endirim kampaniyaları və xüsusi təkliflər də alış davranışına güclü təsir göstərir.

***

May ayında ABŞ prezidenti Donald Tramp danışıqlara daha çox vaxt vermək üçün AB-nin idxalına iyunun əvvəlində tətbiq edilməsi planlaşdırılan yeni tariflərin təxirə salınacağını açıqlamışdı. Tariflər iyulun 9-dək təxirə salınıb. AB həmçinin ABŞ məhsullarına planlaşdırılan əks-tarifləri hələlik dayandırıb.

“YouGov”un son sorğusuna görə, Almaniyada insanların böyük əksəriyyəti yeni tariflər nəticəsində qiymətlərin artacağını gözləyir.