Dövlət Statistika Komitəsinin 2024-cü ilə olan hesabatına əsasən, Azərbaycanda 192 stadion var. Bunlardan 67-si tutumu 1 500 və daha çox tutumu olan, 125-i isə tutumu 1 500 və daha az olanlardı.

Maraqlı rəqəmlərdi.

Bununla yanaşı, ölkəmizdə 45 Olimpiya idman kompleksi fəaliyyət göstərir. Bunlardan neçəsində standarta uyğun meydança var, qeyd olunmayıb. Qurğular barədə başqa statistikalar da var, amma o qədər də vacib deyil.

Yuxarıda qeyd etdiyim statistika cavabdan çox sual yaradır. Məsələn, tutumu 1 500-dən çox olan bu 67 stadion hardadır, hansıdır? Niyə bunun heç yarısını biz tanımırıq? Yaxud digər 125 arenada kimlər oynayır, ümumiyyətlə, orda futbol oynanırmı? Həmin 67 böyük stadion həqiqətən varmı, yəni sənəddə olduğu kimi funksionallığı da qalıbmı? Yerində bina tikiblərmi, yaxud tikməyi planlaşdırıblarmı? 125 kiçik stadion sadəcə ad olaraq qalıbmı, ərazisində mal-qara otarırlarmı? Qumdur, palçıqdır, asfaltdır, süni örtükdü, düzdü, əyridir?

Suallar çoxdur.

Bu rəqəmləri ümumi götür-qoy edəndə Azərbaycanda 200 civarında böyük futbol oynamağa uyğun gələn məkan olduğu görünür. Ölkə reallığını nəzərə alsaq, bunun maksimum yarısı “ələ gələn” vəziyyətdə olduğuna ümid edə bilərik. Yəni uzağı 100 stadion.

Bəs bu 100 stadionda kimlər oynayır?

10 Premyer Liqa, 10 I Liqa, 14 də II Liqa klubları. Üç gün əvvəl püşkü atılan Region Liqasında da 54 komanda mübarizəyə qoşuldu. Bir sıra komandaların eyni stadionda oynadığını nəzərə alsaq, maksimum 70-75 arenada futbol oynanır ki, bu da 10 milyonluq ölkə üçün böyük rəqəm sayıla bilməz. Heç 200 də çox deyil. Aktiv olsalar, yenə müəyyən qədər razı qalmaq olar.

Futbol oynamaq istəyirik, amma yerimiz yoxdur. Öncə bundan başlamalıyıq.