ABŞ prezidenti Donald Tramp bugünkü çıxışında ABŞ Konqresinə nüvə proqramı ilə əlaqədar İrana qarşı sanksiyaların bərpasını təklif etməyəcək. Bunu ABŞ-ın dövlət katibi Reks Tillerson «CNBC» telekanalına müsahibəsində bildirib.

Onun sözlərinə görə, ABŞ administrasiyası İrana qarşı yeni strategiya tətbiq etmək niyyətindədir. Tillerson qeyd edib ki, İranın nüvə proqramına dair bir neçə meyar təklif ediləcək. Onlar pozulduğu halda Tehrana qarşı sanksiyalar avtomatik olaraq bərpa ediləcək.

Dövlət katibi həmçinin bildirib ki, Tramp İran İslam İnqilabı Keşikçiləri Korpusu (SEPAH) üzvlərinə qarşı sanksiyalar tətbiq etmək niyyətindədir. Onun sözlərinə görə, Tramp bununla bağlı ABŞ Maliyyə nazirliyinə müvafiq tapşırıq verəcək.

Qeyd edək ki, ABŞ-ın maliyyə nazirliyinin saytında İrana qarşı yeni sanksiyalar tətbiq edilməsi barədə məlumat yerləşdirilib.

Məlumata əsasən, İran İslam İnqilabı Keşikçiləri Korpusu (SEPAH) terroru dəstəkləyən təşkilatlar siyahısına daxil edilib.

Həmçinin İranın «Fanamoj», «Rastafann Ertebat Engineering Company» və «Shahid Alamolhoda Industries» şirkətlərinə qarşı sanksiyalar tətbiq edilib.